Hüüt vör een Johr, an’n 15. Nevelmaand 2021, weer de eerste Online-Warksteed mit junge Lüüd! Verleden Johr hebbt wi uns vörnahmen, uns an junge Lüüd – de tokamen Generatschoon för de Spraak – to wennen un jüm to fragen, wat se bruukt, dat se in jümehren Alldag mehr Plattdüütsch snacken·praten·küren·spreken etc köönt. Dor hebbt wi uns mit bummelig 25 junge Lüüd, Afornten vun’n Düütschen Bunnsdag un mit Lüüd ut den Bunnsraat för Nedderdüütsch drapen. Snackt hebbt wi över Spraakpolitik för Platt un junge Lüüd, över Platt in de Kultur un in’n Alldag. Bavenan stünn de Fraag: Wat müss sik för de jungen Lüüd ännern?
Dat geev heel veel Intress an en regelmatig Anbott för junge Lüüd. De Deelnehmers hett de Uttuusch mit anner junge Lüüd un dat Vernetten mitenanner so goot daan! Wi sünd wies worrn, dat för en plattdüütsch Anbott för junge Lüüd na de School in’n Alldag noch bannig veel maakt warrn mutt! Mennigeen Deelnehmer weer denn eerst opfullen, dat dat ok noch anner Lüüd in jümehr Öller gifft, de sik för Plattdüütsch intresseert un sik för de Spraak insetten wullt. Moot hett ok maakt, dat uns de Afornten inlaadt hebbt, jüm in Berlin to besöken.
Dorüm sünd wi doran bleven un hebbt de jungen Lüüd ok 2022 wieder föddert.
Mit dat Konzept, dat wi 2021 al bi de Arbeit mit de jungen Lüüd utarbeidt hebbt, hebbt wi in’n Märzmaand 2022 bi den Sachverstännigen-Utschuss vun den Europaraat ok över de Situatschoon un de Wünsch vun de jungen Lüüd vertellt.
In’n Aprilmaand hebbt över 50 junge Lüüd bi uns Warksteed över Plattdüütsch an de Universität mitmaakt – vun allerwegens ut’t Spraakrebeet un ok ut't Butenland hebbt sik junge Lüüd toschalt. Uns Warksteden hebbt sik düt Johr nich so as verleden Johr jüst allmeen üm junge Lüüd un Spraakpolitik dreiht, nee, wi hebbt uns enkelte Saken mehr ankeken: dat Nedderdüütschstudium, Nedderdüütsch in de Medien oder Botschafterprojekten an Scholen as bi de Däänsche Minnerheit.
In’n Junimaand hebbt wi mit Mareike Meents, Kevin Behrens un Thees Becker denn ok dree junge Lüüd as Beopdragde för de jungen Lüüd för den Bunnsraat för Nedderdüütsch wunnen. Se schüllt sik in’n Bunnsraat för de jungen Lüüd insetten. Dorüm gifft dat uns nu ok op Instagram ünner @jung.un.platt un bi Facebook un Twitter as @jungeluud.
In de Sommertiet hebbt wi ok anfungen, dat niege Format junge Lüüd ünner sik to etableren: en Online-Kring to’n Snacken un Uttuuschen ahn faste Themen. De Online-Runn för junge Lüüd, bi de jeedeen mitmaken kann, gifft dat nu eenmal in'n Maand, üm Platt mit anner junge Lüüd to snacken oder ok, üm sik dor in to pröven.
Vun Septembermaand af an kunnen wi bi’t Nedderdüütschsekretariaat en niege Steed inrichten: Kevin Behrens kümmert sik in uns Team mit üm de Jöögdarbeit.
Wi sünd as junge Lüüd-Vertreders ok bi den Beraden Utschuss för Nedderdüütsch in Stapelfeld ween un hebbt dor vun de Situatschoon vun junge Lüüd vertellt. Wi hebbt rutstellt, dat wi hoochnödig mehr Anbott för den Alldag vun junge Lüüd bruukt.
Wat junge Lüüd föddert, dat hebbt wi nu as de Berliner Verkloren in acht Punkten opschreven. Verleden Week weren wi to Besöök in’n Bunnsdag in Berlin un hebbt uns Wünsch an de Afornten vun den Parlamentskreis Plattdüütsch övergeven.
Meist hunnert Lüüd hebbt wi nu in uns Junge Lüüd-Mailverdeler un mit jeedeen Warksteed kaamt mehr dorto. In de Junge Lüüd-Redakschoon gifft dat nu ok de Mööglichkeit för junge Lüüd, Texten för anner junge Lüüd to schrieven. De warrt bi uns op de Websiet apentlich maakt un schüllt dat Anbott an plattdüütsche Texten för junge Lüüd – in de dat nich üm dat Plattdüütsche sülvst geiht - breder maken.
Un wat steiht nu noch an? Wi wüllt wiedermaken mit de Warksteden un ok mit Junge Lüüd ünner sik. Ok hebbt wi nu noog Materiaal an de Hand, dat wi anner Lüüd uns Punkten verkloren köönt. Tokamen Maand gifft dat noch en Warksteed to plattdüütsche Literatur un junge Lüüd un villicht etableert sik ja noch en jung Literatur-Kring 2023? Över de Idee vun Schölerbotschafters so as bi de Däänsche Minnerheit wüllt wi ok wieder nadenken.
Nadine Koop
