„Wi snackt Platt“-Schiller

Schilder von Wi snackt Platt sind an der niederdeutschen Bibliothek

In vele Rebeden vun Plattdüütschland gifft dat noch Steden, wo een ok in de Apentlichkeit Plattdüütsch bruukt. Dat mag ween, dat dat bi en Bäcker, in en Laden, in de Verwalten, op Amt, bi en Dokter oder annerwegens is. Wenn Plattsnackers:chen na so en Oort kaamt, weet se gor nich, dat een de Spraak dor ok snacken kann. För düssen Fall gifft dat nu ne'e Schiller, de wiesen schöölt: Hier kann een Platt! So rückt een de Spraak wedder mehr in den Vörgrund un de Lüüd warrt anröögt ehr ok to snacken. Dat eerste Schild hangt al, as op dat Bild baven to sehn is, an'n Ingang vun de Nedderdüütsche Bibliothek vun de Carl-Toepfer-Stiftung in Hamborg.

Op de Schiller finnt sik eenmal en Koort vun Plattdüütschland un heel kott verkloort, dat Nedderdüütsch en egen un offitschelle Spraak vun'n Norrn is. De Lüüd warrt direktmang anspraken un motiveert, Platt as Normalspraak in'n Alldag to bringen. Düsse Schiller weegt nich veel un hoolt ok mit normale Kleevstriepens an Finters, Wänn un Dören. Dat gifft twee Verschonen: De een is för dat Rebeet, wo een gröttendeels "snacken" seggt, man anner Formen as "praten" un "küern" finnt een dor ok op. Dat anner Schild is för Rebeden, de nich "snacken" bruukt, dor finnt sik avers ok all Spreekwiesen op, üm de Lüüd direkt antospreken.

Een kann de Schiller bi uns köstenlos bestellen. Eenfack en E-Mail an info@niederdeutschsekretariat.de schicken un seggen, wat för en Schild een hebben will. Se köönt ok mehr Schiller ordern un de an anner Steden verdelen. Weest so goot un seggt Se in düssen Fall, an wat för anner Personen un Steden dat gahn schall.

Verschoon 1
Verschoon 2

Woneem hangt de Schiller?

In düssen Bidrag sammelt wi en poor Biller, woneem de Schiller hangen doot. Wi freit uns, wenn Se uns ok en Bild tostüert! (an info[at]niederdeutschsekretariat.de)