För de föffte Reeg vun uns Podcast klookluustert weren wi mal wedder op Törn. Uns Moderaters hebbt sik mit dat Thema Plattdüütsch in de Nutiet befaat. Woso wi uns jüst düt Thema utsöcht hebbt? An’n 1. Dezember wüllt wi künnig maken, wat bi uns Ünnersöken Nedderdüütsch 2026 rutsuert is. Un as Vörbereden kiekt wi uns den aktuellen Stand vun de Regionalspraak an. Wi wünscht veel Pläseer bi’t Klookluustern! Ji köönt klookluustert överall dor hören, wo dat Podcasts gifft. Wenn ji Fragen un Trüchmellens hebbt, schrievt uns geern an info@niederdeutschsekretariat.de.
Stremel 1 „Plattdüütsch opstünns – vun sien aktuellen Stand un en ne’e Ünnersöken“ (30.10.2026)
In den eersten Stremel geiht Christoph Ahlers de Fraag na, woans dat üm de plattdüütsche Spraak opstünns steiht. He kickt, wat bi de verleden Ümfraag vör 10 Johr rukamen is un verkloort, woso dat so wichtig is, dat 2026 en ne’e Ümfraag dörchföhrt worrn is. Op sien Törn is Christoph verscheden Lüüd bemött: He hett mit Vertreders:schen vun nedderdüütsche Institutschonen snackt, mit Lüüd ut de Sprekergrupp un ok mit Minschen, de to de Mehrheitssellschop höört un vun buten op de Spraak kieken doot.
Mit düsse Lüüd hett Christoph Ahlers snackt:
- Christiane Ehlers, Baas’sche vun’t Nedderdüütschsekretariat
- Gesa Retzlaff, Baas’sche vun’t Plattdüütschzentrum för den Lannsdeel Sleswig
- Thorsten Börnsen, Baas vun’t Lännerzentrum för Nedderdüütsch in Bremen
- Judith Hörger, kümmt ut Hessen, wahnt in Stuttgart un maakt geern Oorloff in Noorddüütschland
- Markus Schüerholz, kümmt ut’t Suerland, leevt al lange Tiet in’n hogen Noorden
- Helge Eggert ut Preetz, Dozent för Sweedsch an de VHS, opwussen in Sweden un Düütschland
- Bernadette McMahon-Rupp, kümmt ut Irland, wahnt al lang in de Probstee
- Nils Tümmler, Plattsnacker ut Sleswig-Holsteen, wahnt in Neddersassen
- Ulrike Stern, Wetenschoppersche an’t Kompetenzzentrum för Nedderdüütschdidaktik in Griepswold
- Marianne Ehlers, Sprekersch vun’n Plattdüütschen Raat Sleswig-Holsteen
Christoph sien Fazit: Wi weet noch nich, wat wi de ne’e Ümfraag to Plattdüütsch rutkümmt – Is dat so, dat dat Image vun Plattdüütsch beter worrn is, man dat de Sprekertallen wieder torüchgahn sünd, dat Plattdüütsch mehr sichtbor, man weniger höörbor is? Wat bedüüd dat för en Spraak, wat för en Rull speelt de Medien, un wat för en Rull de Scholen? Enig sünd sik all, mit de he snackt hett: De Regionalspraak höört to Noorddüütschland dorto un se is en Kulturgoot, dat nich ünnergahn dörv. Man rein ehrenamtlich warrt dat nich to redden sien.
Stremel 1 op Spotify anhören
Stremel 2 „Plattdüütsch in de Moderne – twüschen Ne’e Medien, Internett un Literatur“ (13.11.2026)
In den tweten Stremel sett sik Benita Brunnert dormit uteneen, woans dat mit de Spraak in de ne’en Medien utsüht, un fraagt na, woans dat üm moderne Literatur op Platt steiht. Ok se hett mit Vertreders:schen vun plattdüütsche Institutschonen snackt, jüst so mit jüngere Lüüd, de sik op Social Media för de Spraak insetten doot. Se wull weten, wat se vun de plattdüütschen Anbotten in de ne’en Medien hoolt un wat de Institutschonen för junge Lüüd anbeden doot. Un ok to dat Thema plattdüütsche Literatur hett Benita verscheden Sichtwiesen tosamendragen.
Mit düsse Lüüd hett Benita Brunnert snackt:
- Marie-Sophie Koop, Baas’sche vun’t Zentrum för Nedderdüütsch in Holsteen
- Lisa Wrogemann, plattdüütsche Podcastersche, de anner Lüüd op Instagram oder bi en Billensoorloff Platt lehrt (Instagram: eat.platt.love)
- Christian Richard Bauer, Schauspeler un Plattdüütschaktivist (Instagram: crbauer)
- Hilka Jeworrek, Spraakwetenschoppersche mit plattdüütschen Pocast (Instagram: ballerdutje)
- Nele Otten, Leidersche vun de Bibliothek vun’t Institut för nedderdüütsche Spraak in Bremen
- Robert Langhanke, Lehrkraft för besünner Opgaven för de Nedderdüütsche Spraak an de Europa-Universität Flensborg
- Nikos Saul, Schrieversmann, Poetry Slammer un wetenschoplichen Mitarbeider bi’t Lännerzentrum för Nedderdüütsch in Bremen
Benita ehr Fazit: Platt bruukt Sichtborkeit, in de sozjalen Medien jüst so as in Bökerien oder in’n Bookhannel. Dat bruukt Steden, neem een tohoopkümmt, Mööglichkeiten to’t Publizeren un ok en Kulturföddern, de plattdüütsche Literatur un Kunst nich blots as en Ehrenamt verstaht. Denn wo attraktiv en Spraak för de Lüüd is, hangt villicht ok dormit tosamen, wat een mit ehr allens beleven kann.
Stremel 2 kümmt an’n 13.11.2026 rut.
Stremel 3 Ole Mythen vun de Muddermelk un New Speakers (27.11.2026)
In den drütten Stremel befaat sik Lina Martschin mit den olen Mythos vun de Moddermelk: Plattdüütsch mutt een vun Huus ut mitkregen hebben, anners warrt dat so un so nix mit de Spraak. Is dat würklich so? Dor snackt se mit New Speakers över, also Lüüd, de Platt later in’t Leven lehrt hebbt. Woans hebbt se dat maakt, wat weer ehr Motivatschoon un wat sünd Rutfödderns bi’t Lehren. Un denn stellt sik natürlich de Fraag, woans dat bi Native Speakers ankümmt. Un opletzt: Woneem kummt düsse Mythos egens her?
Mit düsse Lüüd hett Lina Martschin snackt:
- Birgit Schütte, Petra Witte, Fentke Stolle un Austen Dobrin-Stein vun’t Nedderdüütsche Theater Demost (Instagram: niederdeutsches_theater_ntd)
- Jan Jochen Meyer, Jürgen Meins un anner Liddmaten ut den Plattdüütschkring vun’n Heimatvereen Demost
- Lennon von Seht, Ledermaker ut Neemünster (Instagram: lennonvonseht)
- André Graën, Daron Pieper un Christian Rother, Studerende ut den Nedderdüütsch-Studiengang an de Uni Ollnborg
- Prof. Dr. phil. Birte Arendt, Baas vun’t Kompetenzzentrum för Nedderdüütschdidaktik in Griepswold
Lina ehr Fazit: De Grünnen, Plattdüütsch to lehren, sünd männichfolig, man de Grundlaag dorför geiht tomeist doch bi all New Speakers in desülvige Richt: Lust op de Spraak, op’t Bewohren, Schulen, Wiedergeven! Native Speakers freit sik doröver, ok wenn se sik villich noch an de een oder anner Dialekt vun’t Nedderdüütsche wennen mööt. De olen Vöroordelen? Meist nich mehr to finnen. Un as Oproop för all de Lüüd, de ok New Speakers sünd oder dat warrn wüllt: eenfach troen, Moot to’t Lock, Platt snacken. Anners weer’t dat bald mit de Spraak.
Stremel 3 kümmt an’n 27.11.2026 rut.
Stütt geven för dat Podcastprojekt hett dat Bunnsbinnenministerium.
