An’n 15. Oktobermaand is in Berlin mal wedder Platt snackt worrn: De Bunnsraat för Nedderdüütsch, dat Nedderdüütschsekretariat un dat Nettwark Junge Lüüd sünd mit Bunnsdagsafornten vun’n Parlamentskreis Platt to en parlamentoorsche Teestünn tohoopkamen. Bi dat Drapen in’t Paul-Löbe-Huus güng dat vör allen üm de ne’e Ünnersöken to den aktuellen Stand vun Plattdüütsch in’t Spraakrebeet, de wi düt Johr dörchföhrt hebbt. Dat Intress bi de Afornten an de Rutkümst weer groot: Fragen as „In wat för Situatschonen bruukt de Minschen in’n Alldag Platt?“ un „Wo oolt sünd de Minschen, de de Spraak aktiv bruken doot?“ sünd för jüm jüst so relevant as dat Weten doröver, wat Lüüd ut de Mehrheitssellschop över de Spraak denkt oder wat plattdüütsche Anbotten in Kinnergoorns un Scholen würklich wünscht warrt. Vörstellt warrt de Resultaten vun de Ümfraag an’n 1. Dezembermaand in Hamborg, man güstern hebbt wi vöraf al en beten wat wiest un mit de Afornten doröver diskereert, wat dat för de spraakpolietsche Föddern bedüden deit.
Wi bedankt uns bi den Parlamentskreis Platt, de dat mööglich maakt hett, dat wi vun’n Bund finanzjelle Stütt kregen hebbt un de Ünnersöken dörchföhren kunnen.
Ehr dat de Afornten gau na en naamliche Afstimmen müssen, harrn wi noch Tiet för en Teetied mit Kluntjes un ’n Wulkje Rohm: Johann Saatfhoff, MdB, un Dieke Günther, Jöögdbeopdraagten in’n Bunnsraat för Nedderdüütsch, hebbt vörstellt, woans dat mit dat Teedrinken in Oostfreesland aflöppt. Un bi en gode Tass Tee kunnen wi uns noch över de een oder anner Fraag to de Bedüden un den Stand vun de Regionalspraak uttuuschen.
Egens stünnen noch twee anner Themen op de Dagsornen: Dat schull noch üm den Spraakplaan Nedderdüütsch 2050 un de Modellprojekten gahn, de wi 2025 dörchföhrt hebbt. Un denn wull sik dat nee grünnte Nettwark Junge Lüüd (NJL) vörstellen. Dor hett de Tiet vunwegen de Afstimmen nich mehr to langt, man de Parlamentskreis hett toseggt, uns nochmal online intoladen, üm düsse Themen vörstellen to könen.
Wi seggt hartlichen Dank an Linda Heitmann (Bündnis 90/De Grönen), Johann Saathoff (SPD), Anja Troff-Schaffarzyk (SPD), Frauke Heiligenstadt (SPD), Andreas Mattfeldt (CDU), Stefan Seidler (SSW) un de Vertreders vun’t Bunnsbinnenministerium för de Gespräken in Berlin un jümehr Stütt un Stöön för Plattdüütsch.
