Jüst hett dat Land Sleswig-Holsteen den „Handlungsplan Sprakenpolitik“ in de Maak. Ok de Sprekergrupp hett den Plaan ankeken un egen Ideen un Anmarkens an’t Land geven. Nu hett hett de Plattdüütsche Raat sik mit den Minnerheitenbeopdragten Johannes Callsen uttuuscht un dorto noch över vele Themen rundüm Platt snackt.
Woans süht dat ut mit de Chartaspraken in de Kinnergoorns in uns Land? Wo warrt Däänsch, Freesch oder Plattdüütsch anbaden? Un woans löppt dat: mit de Immersionsmethood, also dat Indükern in en Spraakbad – oder noch ganz anners? Över all düsse Fragen hett de Raat mit Johannes Callsen snackt un den Vörslag maakt, en Ümfraag in’t Land bi de Dregers vun Kinnergoorns op den Weg to bringen.
Un wat mutt op den Weg hen na mehr Platt in de Medien passeren? Mit veel Visionen schull de Sprekergrupp dor mal rangahn – un mag angahn, na en Tiet kunn dat en Mediensteed för de Spraak geven.
Veel löppt al wunnerbor, veel is op en goden Weg in uns Land – man dat gifft ok noch veel to doon.
Marianne Ehlers, Plattdüütsche Raat
Foto vun links na rechts: Heiko Gauert, Truels Hansen, Marianne Ehlers, Dr. Heike Schmidt, Johannes Callsen
