Bi de beiden Prestige-Veranstaltens an’n 5. November in Madeborg un an’n 27. November in Cloppenborg, to de de Bunnsraat för Nedderdüütsch un dat Nedderdüütschsekretariat nödigt harrn, güng dat üm de Fraag, woans een Plattdüütsch in de Region sichtbor maken kann. Twee heel verscheden Nedderdüütschregionen: Dat Süüdollnborger Mönsterland hett noch en Barg Sprekers, in Sassen-Anholt süht dat man leeg ut mit de aktive Spraakkompetenz. Man lett sik dat ok op dat Ansehn vun de Spraak överdregen? Un wat kann een doon, üm dat Prestige to verhögern?
In’t Krapp-Huus vun den Heimatvereen Cloppenborg un in’t Café Gusto in Madeborg weren Intresseerten ut de beiden Region tosamenkamen, üm sik över düsse Fragen uttotuuschen. En wichtigen lokalen Akteur weer de Verbund Oldenburger Münsterland, de för Weertschoftskommunikatschoon un Tourismusmarketing tostännig is un en Reeg. De Verbund will Produkten un Deenstleistens ut de Region bekannter maken un dorför sorgen, dat de Minschen sik mehr mit jümehr Region identifizeren wüllt. De Initschatiev vun’t Nedderdüütschsekretariat kunn dat anstöten, dat hierbi in Tokumst ok Plattdüütsch en Rull spelen schall. Un dat will de Verbund mit anner Partners ut de Region doon.
Toeerst geev dat bi beide Veranstaltens to’n Instieg en Vördrag vun de Warkkoppel Spraakplaan Nedderdüütsch 2050, wo dat üm de Schangsen güng, dat Image vun de Spraak dör’t Sichtbormaken to verbetern.
In en Präsentatschoon is wiest worrn, wat för Methoden un Mööglichkeiten dat dorför gifft:
- Plattdüütsch as Kommunikatschoonsmiddel bewarven, as mit Pins oder Schiller
- Dör Symbolcharakter Platt sichtborer maken
De Diskuschoon dorna hett wiest, dat Plattdüütsch as Kommunikatschoonsmiddel beter för de Region Süüdollnborger Mönsterland dögen deit, wo noch mehr wat an Spraaksubstanz dor is, man dat sik mit den Symbolcharakter in beide Region allerbest arbeiden lett. In de Präsentatschoon sünd Produkten as Servietten un Beerdeckels, Kledaasch, Büdels, Opbackers, Bekers oder Schiller vörstellt worrn. Un en poor Bispeel-Produkten mit Platt sünd ok druckt worrn, dat de Lüüd sik dat beter vörstellen kunnen un Ideen kriegt, de sik ümsetten laat. Vörstellt worrn sünd ok Bispelen vun anner Spraken as Soorbsch in Buudsen oder Uttekens för Ünnernehmens, de en Spraak sichtbor maakt, so as för Bretoonsch.
Tosamen mit de Deelnehmers sünd bi beide Veranstaltens vele Ideen utklamüüstert worrn, de för de verscheden Nedderdüütsch-Regionen passlich sünd. Sünnerlich freien deit uns, dat sik na de Veranstalten en Warkkoppel grünnt hett, de mit Platt för de Region Warv maken will. Un ok in Sassen-Anhoolt sünd regionale Vermarkters nu dorför sensibiliseert, dat een ok in en swacke Nedderdüütschregion mit de Spraak Spood hebben kann – ok en Produkt, dat en plattdüütschen Naam kriggt, kann en Anfang ween.
Präsentatschoon dalladen
Wokeen nich bi de Veranstalten dorbi weer, kann hier de Präsentatschoon to den Vördrag dalladen, de vele Ideen un Anregens gifft, woans een de Spraak sichtbor maken kann: Plattdüütsch in de Region sichtbor maken
