Wiehnachtswünsch vun den Bunnsraat för Nedderdüütsch

Leve Frünnen vun de plattdüütsche Spraak,
bilütten schall dat Wiehnacht warrn - ok wenn dat mit witte Wiehnacht düt Johr nix warrt.
Wi kiekt trüch op en Johr, in dat de Welt mal wedder op'n Kopp stellt worrn is. Bannig veel Minschen kunnen nich mehr in Freden leven un hebbt ehr Tohuus verloren, de Sorgen sünd groot. Saken, de wi as sülvstverständlich ansehn hebbt, gellen mitmal nich mehr.
Man wi kiekt ok trüch op en Johr, in dat wi wedder mehr in't Mit’nanner kamen sünd un uns wedder bemöten kunnen. Na so en lange Tiet, in de wi meist blots in de digitale Welt ünnerwegens weern, hebbt wi wedder tosamen an en Disch setten un uns in de Ogen keken. So lett sik ganz anners mit'nanner arbeiden.
De Wannerutstellen "Was heißt hier Minderheit?" kunn endlich wiest warrn: En ganze Reeg Besökers hebbt ehr in Berlin, Leer, Kiel oder in Flensborg to sehn kregen un weern villicht bi de een oder anner Veranstalten dorbi. De Bunnsregeren kunn wedder ehr Dören apen maken un Intresseerte na Berlin inladen. Un wi weern mit en Trupp junge Lüüd to Besöök in'n Bunnsdag un hebbt uns mit Afornten över Plattpolitik för junge Lüüd uttuuscht.
Nu kümmt eerstmal de stille Tiet – wi köönt uns verpuusten un de Arbeit en lütt Stück bisiet schuven. Uns Dank gellt all de Minschen, mit de wi in düt Johr tohoop arbeidt hebbt – un de uns an so männich Steed stütt un holpen hebbt.

Mit hartlich Wiehnachtsgröten un de besten Wünsch för 2023
Johanna Bojarra un Heinrich Siefer, Sprekers vun den Bunnsraat för Nedderdüütsch
un Christiane Ehlers för dat Nedderdüütschsekretariat

Winter-Wiehnacht

Snee is fullen
ganz liesen över Nacht
witt is de Welt
un wunnerschöön

Laat uns lopen
ganz sachten över’n Weg
smuck is dat Land
mit witte Bööm

Wi köönt sweven
as Engels över uns
Wiehnacht is dor
bi di un mi

Laat uns wünschen
för Minschen överall
Freden schall warrn
op unse Eer

Marianne Ehlers
Wiehnachten 2022