Leve plattdüütsche Frünnen,
wat för en Tiet, wat för en Johr! Dat schall nu Wiehnachten warrn, un wi kiekt torüch op 2020 as en Johr, wat uns ganz anner Wöör un en anner Mit’nanner lehrt hett: weltwiede Süük, Afstand holen, Dook oder Mask vör Mund un Nees, Wohrschau för Reisen, in’t Huuskontor arbeiden - allens op Null.
Corona is överall – un snackt wi en poor Minuten mit uns Naver, denn kaamt wi foorts op dat Thema. Geiht gor nich anners. Is meist so as bi den Dokter in’n Töövruum, wo de Lüüd blots över Krankheiten snacken doot. Un egentlich hebbt wi soveel anners, wat uns wichtig is un wo wi veel lever över snacken müchen.
Ok för den Bundesraat för Nedderdüütsch un för dat Nedderdüütschsekretariat hett dat heten: nix kunn so lopen as wi dat plaant harrn. Keen Terminen in Berlin, keen Drapens in Hamborg, keen Sprakendag, keen Veranstaltens – man en ganzen Barg Videokonferenzen. Allerwegens weer to marken, dat dat normale Mit’nanner böös fehlen deit. Kloor geiht dat allens, man dat kost Knööv un strengt an. Wi müssen kreativ warrn: Dree kotte Verkloorfilmen to de Charta un een Film to den Sprakendag gifft dat denn in’t ne’e Johr to sehn.
Nu kümmt eerstmal de stille Tiet – wi köönt uns verpuusten un de Arbeit en lütt Stück bisiet schuven. Ok Wiehnachten is anners, wi dörvt nich mit toveel Lüüd an’n Disch sitten. Man dat warrt sik torechtlopen – un wi köönt dankboor na vörn kieken, wenn wi gesund bleven sünd.
Uns Dank gellt all de Minschen, mit de wi in düt besünner Johr tohoop arbeidt hebbt – un de uns an so männich Steed stütt un holpen hebbt.
Woans dat in’t tokamen Johr utsüht? Nüms kann dat nu al seggen, dorüm laat uns de stille Tiet för all dat nehmen, wat uns goot deit. En bunten Dannenboom dörv geern dorbi ween.
Mit hartlich Wiehnachtsgröten un de besten Wünsch för 2021
Saskia Luther un Heinrich Siefer, Sprekers vun den Bundesraat för Nedderdüütsch
un Christiane Ehlers för dat Nedderdüütschsekretariat
Bunt as dat Leven
Bunt schall he ween
in düt Johr
mien Dannenboom
ik bruuk dat nu
dat Lüchten vun de Farven
na düt Johr
de een seggt
dat Johr weer gries
langtöögsch un trurig
keen Höpen keen Freud
de anner seggt
dat Johr weer hart
swoor un so leddig
keen Arbeit keen Geld
wat segg ik
dat Johr weer bunt
snaaksch un ganz anners
mehr buten veel Tiet
un dorüm is he so bunt
mien Dannenboom
sien Farven lücht
hen na dat anner Johr
över em en Steern
bunt as dat Leven
Marianne Ehlers
