Dat Thema Moderspraak in de Pleeg höört middewiel in vele Gegenden sülvstverständlich dorto. Jüst för Minschen, de Demenz hebbt, man ok för öllere Lüüd, de krank sünd un Pleeg bruukt, kriggt ehr Moderspraak wedder en grötter Bedüden. Se kann en Slötel ween, dat sik de Minschen wedder op Beleevnissen vun fröher besinnen doot.
2019 hett de Bunnsraat för Nedderdüütsch (BfN) tohoop mit de Ollnborger Landskup dat Book „Weetst Du noch?“ rutgeven. En Book, dat sik an Minschen richten dee, de in de Pleeg arbeidt, un jüm Stütt geven schull, mit de Lüüd Platt to snacken. Biller vun fröher schullen hölpen, mitenanner in't Gesprääk to kamen. De druckte Faten vun dat Book is al lang vergrepen. Man noch vundaag bruukt en Barg Pleeginrichtens dat Material.
2023 hett de BfN nu tohoop mit de Kothoolsche Akademie Stapelfeld „Weetst Du noch - Book 2?“ rutbröcht. De twete Band much mit Biller, passliche Wöör un kotte Verklorens dorto wedder Vörslääg maken, wieder mitenanner in’t Snacken to kamen. Dat Book sett in de 1960er Johren an. Wi finnt Biller ut den Alldag vun de Minschen – de eerste Schooldag, en Utfloog in den Spreewoold, de eersten Autos. Man dat gifft ok Biller to wichtige Begeevnissen as de grote Stormfloot, de Maandlannen oder de Studentenprotesten, de to de Tietgeschicht dortohören doot. In den Tietruum, de mit dat Book afdeckt warrt, weer Düütschland deelt, wat sik in den Alldag vun de de Minschen wedderspegelt hett. Ok dat warrt bi de Biller un bi de Texten dorto mitbedacht. Wenn dat üm Themen as Reisen, Autos oder Sportslüüd geiht, denn mutt een dor vun twee Perspektiven ut ropkieken.
Stütt geven för den Druck hett dat Ministerium für Wetenschop, Forschen un Kultur vun't Land Brannenborg.
"Weetst du noch - Book 2" bestellen oder dalladen
"Weetst du noch - Book 2" kann een as pdf-Dokument dalladen oder as druckte Faten bi't Nedderdüütschsekretariat ordern. Schrievt eenfach an Mail an info@niederdeutschsekretariat.de, ji köönt ok geern mehr Exemploren kriegen. Kösten deit dat för jo nix.
Download "Weetst du noch - Book 2"
