Platt in uns Land
Wahl vun den Plattdüütschen Raat för Sleswig-Holsteen
för de 8. Wahlperiood (2022-2026)
an’n 30. April 2022 Klock 2 in’t Hoge Arsenal, Arsenalstraat 2, Rendsborg
De Plattdüütsche Raat laadt all Lüüd in’t Land, de sik för de Spraak intresseren doot, hartlich to düsse Wahlveranstalten in. Bidde mellt Se sik per Mail an bi de Sprekersch Marianne Ehlers, m.ehlers@heimatbund.de oder per Telefon bi den SHHB ünner 0431-98 384-0 bet to den 20. April 2022. Ok per Post köönt Se sik anmellen. Jeedeen, de in Sleswig-Holsteen tohuus is, kann bi de Wahl sien Stimmen afgeven.
Siet dat Johr 2000 gifft dat in Sleswig-Holsteen den Plattdüütschen Raat. He snackt för de nedderdüütsche Sprekergrupp in uns Land.
De Raat sett sik in för: Plattdüütsch in Familien – för de Lütten – in School un Uni – in de Pleeg – in de Medien – in de Kark – in de Verwalten etc.
Na 22 Johr sprakenpolitsche Arbeit in Sleswig-Holsteen treckt de Plattdüütsche Raat en positive Bilanz. Veel is op den Weg bröcht worrn för de Spraak in uns Land, jümmers Hand in Hand mit de Politik un dat Nettwark Plattdüütsch, dat goot opstellt is. Dat schall wieder gahn mit de Arbeit för de Spraak, in de velen Gremien, de Institutschonen, Verenen un Verbännen un in den Landdag.
Un dorüm söcht de Raat för de 8. Wahlperiood (2022-2026) söven niege Kandidatinnen un Kandidaten, de sik för düsse Arbeit intresseren doot. Mehr to weten över den Plattdüütschen Raat gifft dat ünner: https://www.heimatbund.de/plattdeutscher-rat.html.
Jeedeen hett de Schangs, sik as Kandidaat oder Kandidatin för den Plattdüütschen Raat opstellen to laten. Wichtig is, dat Se de plattdüütsche Spraak snacken köönt un in Sleswig-Holsteen wahnt. Bidde füllt Se dat Blatt för dat Bewarven ut un schickt dat an de Sprekersch Marianne Ehlers, m.ehlers@heimatbund.de.
Programm:
- Begröten
- Wöör vörweg – Johannes Callsen, Beopdragte för Minnerheiten un Nedderdüütsch
- Gröten vun Peter Stoltenberg, Präsident vun’n Sleswig-Holsteenschen Heimatbund
- Sprakenpolitik in acht Bundslänner – Christiane Ehlers, Nedderdüütschsekretariat
- „Funklock stoppen!“ – Jan Graf, Sleswig-Holsteensche Heimatbund
- Aktuelles över Plattdüütsch in de School – Karen Nehlsen, IQSH/MBWK
- De Kandidatinnen un Kandidaten stellt sik vör
- De Plattdüütsche Raat warrt wählt
- De niege Plattdüütsche Raat steiht fast
- Verafscheden
Dör dat Programm föhrt Heiko Gauert, Maat in’t Präsidium vun den Sleswig-Holsteenschen Heimatbund un vun den Plattdüütschen Raat.
