„… un op eenmal is man binnen in en Nettwark för de Spraak.“

Marianne Ehlers, Eiderstedt, Schleswig-Holstein

Wat för en Bedüden hett dien Moderspraak för di un wat gefallt di an de Spraak?

Plattdüütsch is mien Spraak. Ik kunn mi nich vörstellen, dat ik ahn ehr leven kunn. Se höört to mi to. Se is mien ganze Leven bi mi bleven – un so schall dat blieven.

Wat för Vör- un Nadelen harr dat för di mit Plattdüütsch as Moderspraak groot to warrn?

Ik heff keen Nadelen hatt. As ik na School keem, harr ik meist noch keen Hoochdüütsch snackt – so as all annern in de lütte Dörpsschool ok. Man ik kunn al lesen, un dorüm weer de hoochdüütsche Spraak mi nich frömd. Mien Ümfeld weer rein vun de plattdüütsche Spraak bestimmt, meist keen Minsch hett in de 50er Johren op de Halfinsel Eiderstedt de hoochdüütsche Spraak bruukt.

Woans giffst du dien Moderspraak wieder?

Ik heff mien Spraak an mien veer Kinner wiedergeven, heff ümmer Platt mit jüm snackt un do dat bet vundaag. De Vadderspraak weer un is Hoochdüütsch – keen vun de Kinner harr dor en Problem mit. Beide Spraken hebbt all de Johren ehr Bedüden hatt. Un nu snack ik Platt mit mien Enkelkinner. Ok wenn se hoochdüütsch antern doot, so verstaht se mi doch allerbest.

Woso un woans settst du di för dien Moderspraak in?

Dat füng an mit Kinnerseminoren op Platt över den Sleswig-Holsteenschen Heimatbund, dorna Fortbillen för Kinnergoorn un School, mien Wahl in den Plattdüütschen Raat för Sleswig-Holsteen un dorna in den Bundesraat för Nedderdüütsch. Denn keem de Referentensteed bi den SHHB. Dorto sünd na un na de ehrenamtlichen Arbeiden kamen, de Fehrs-Gill, de Bevensen-Dagfohrt etc. Een trock dat anner na sik – un op eenmal is man binnen in en Nettwark för de Spraak.

Wo mutt Plattdüütsch ut dien Sicht hoochnöödig Stütt kriegen?

Platt in de Familie is dat Allerbeste, man wenn dat nich mehr klappt, denn mööt Kinnergoorn un School de Regionalspraak fastholen. De Arbeit mit Kinner un junge Lüüd is dat Allerwichtigste, denn de sünd de Tokunft för de Spraak.

Wat för en Raatslag giffst du Minschen, de Plattdüütsch lehren wüllt?

Jedereen mutt dat maken, wat an’n besten passt: Spraakkursen in de VHS, Snackrunnen mit anner Lüüd, alleen mit en Lehrbook, man ok Online-Kursen, Youtube etc. Dat gifft keen Patentrezept, man mutt blots versöken, ok in de Praxis, in’n Alldag Möglichkeiten to finnen.

To'n Anhören

Marianne Ehlers leest twee vun ehr egen Geschichten: "Dat trurige Määrken vun Peper un Solt" un "Grootvadders Immen".