klookluustert, de plattdüütsche Podcast över Wetenschop un Sellschop, etableert sik mehr un mehr un wi köönt nu künnig maken, dat wi al mit de drütte Reeg online gaht. Wielst in de twete Reeg dat Böverthema "Politik för Platt" weer, richt wi uns hier wedder mehr op Weten- un Sellschop ut un hebbt uns as Motto "Duersamkeit" utsöcht. Dat is en bannig groot Rebeet un wi köönt nich all Facetten dorvun afdecken in man fief Stremels. Wi hebbt uns also op wisse Themen beschränkt. Eenmal kiekt wi, wat dat mit dat immateriell Kulturarv "Knick" in Sleswig-Holsteen op sik hett. Denn waagt wi en Blick in de Psychologie un snackt doröver, woans wi uns Resilienz in'n Alldag verbetern köönt. Man ok Ümwelt is en heel groten Fakter vun Duersamkeit, vundeswegen geiht dat eenmal dorüm, woans een mit Ressourcen duersamer ümgahn kann, wat egens negative Ümweltnaklappen vun'n Tourismus ween köönt un wat een dorgegen maken kann. Un wi hebbt dat vun de Verkehrswenn - wat kann jeedeen hier doon, un wat schull de Staat maken?
Wenn di düsse Themen intresseren doot, denn luuster geern in uns Podcast rin un warr kloker. Ok de drütte Reeg to "Duersamkeit" schall to den Utbo vun de Spraak bidregen. Sünnerlich bi Themen ut de Wetenschop fehlt de Wöör op Platt an vele Steden. Vundor is dat wichtig, dat wi hier passliche Begrepen finnen doot. Dör de Arbeit an'n Podcast sünd en Reeg Vörslääg bi rutsuert, de wi bi de SASS-Redakschoon inlangen warrt (https://netz.sass-platt.de).
Wi wünscht veel Pläseer bi't Klookluustern! Du kannst klookluustert överall dor hören, wo dat Podcasts gifft. Wenn du Fragen un Trüchmellens hest, schriev uns geern an info@niederdeutschsekretariat.de!
- De Bedüden vun Knicks för de Naturschuul in Sleswig-Holsteen (op Spotify anhören | op YouTube anhören)
Gast: Heiner Staggen
Moderatschoon: Christoph Ahlers - Resilienz in'n Alldag (op Spotify anhören | op YouTube anhören)
Gast: Ida Matthiesen
Moderatschoon: Benita Brunnert - Duersamen Bruuk vun Ressourcen (op Spotify anhören | op YouTube anhören)
Gast: Dr. Christine Ewers
Moderatschoon: Jan Graf - Duersamen Tourismus (op Spotify anhören | op YouTube anhören)
Gast: Tessa Wefer
Moderatschoon: Christoph Ahlers - Wo steiht dat üm de Verkehrswenn? (21.02.)
Gast: Bernard Brunklaus
Moderatschoon: Christian Richard Bauer
Stütt geven för dat Projekt hett de Beopdraagte vun de Bunnsregeren för Kultur un Medien.