klookluustert is torüch! In uns veerten Stremel vun den plattdüütschen Podcast över Wetenschop un Sellschop gaht wi op Törn. Uns Moderaters weren dütmal in’t Spraakrebeet ünnerwegens.
In den eersten Stremel sett Jan Graf sik mit dat Thema Nedderdüütschgesett uteneen. Dat Land Brannenborg hett siet Juli 2024 dat eerste un bet nu eenzigste Nedderdüütschgesett för de Schuul un de Föddern von de Spraak op den Weg bröcht. Jan verkloort, wat so en Gesett regeln kann un wat nich. Dat geiht dorüm, wat för en Bedüden dat för de Spraak un de Sprekergrupp hett, wenn Plattdüütsch per Gesett schuult is. Un üm de Fraag, woans een dat, wat Brannenborg vörleggt hett, op en anner Land överdregen kunn. As Bispeel warrt hier dat Land Sleswig-Holsteen rantrocken.
För den tweten Stremel weer Christoph Ahlers in’t Spraakrebeet ünnerwegens. Dat geiht üm verscheden Sichtwiesen op Plattpolitik. Christoph snackt mit Lüüd, de sik spraakpolietsch engageert, över ehr Motivatschoon, de Sprekergrupp gegenöver de Politik to vertreden. De Minnerheitenbeopdraagte vun Sleswig-Holsteen vertellt, woans he sik för de Regionalspraak insett un ok een Plattsnackersche, de anners nix mit Politik to doon hett, kümmt to Woort.
In den drütten Stremel kickt Benita Brunnert na vörn. Ünner dat Motto Plattpolitik vun un för junge Lüüd fraagt se na bi junge Lüüd, wat se vun de Plattpolitik verwachten un sik wünschen doot. Un se snackt mit Lüüd, de sik för de Intressen vun de junge Sprekerschop insett un Anbotten maakt.
Wi wünscht veel Pläseer bi’t Klookluustern! Du kannst klookluustert överall dor hören, wo dat Podcasts gifft. Wenn du Fragen un Trüchmellens hest, schriev uns geern an info@niederdeutschsekretariat.de!
- Nedderdüütschgesett (op Spotify anhören | op YouTube anhören)
Moderatschoon: Jan Graf - Verscheden Sichtwiesen op Plattpolitik (14.11.2025)
Moderatschoon: Christoph Ahlers - Plattpolitik un junge Lüüd (28.11.2025)
Moderatschoon: Benita Brunnert
Stütt geven för dat Projekt hett dat Bunnsbinnenministerium.
