Kunferenz un Kunzert an’n 25.10. in Bremen
An’n 25. Oktober richt dat Lännerzentrum för Nedderdüütsch twee Veranstalten in’t Bremer Zentrum för Kunst ut: en Kunferenz to de Rull vun Musik för Regional- un Minnerheitenspraken in Europa – dorto höört ok Nedderdüütsch sülvst – un themaatsch passlich en Kunzert mit de westfreesche Sängersche Mayte.
Kunferenz: Vielstimmig – kleine Sprachen gar nicht leise! (25. Oktober 2025, vun 10:00 an)
Europa leevt vun sien kulturelle un spraakliche Veelfolt. Regional- un Minnerheitenspraken as Furlaansch (Italien), Westfreesch (Nedderlannen) oder Nedersaksisch (Nedderlannen) verföögt över en veelfoltig Kulturleven – nich toletzt in de Musik. Dorwegen laadt dat Lännerzentrum för Nedderdüütsch an’n 25. Oktober in’t Bremer Zentrum för Kunst to en Kunferenz in, de sik mit dat Potentschal vun Musik för Regional- un Minnerheitenspraken befaten deit. Kortvördrääg över de Bedüden vun Musik för Furlaansch, Westfreesch, Nedersasksisch, Sorbsch un Nedderdüütsch billt de Grundlaag för Diskussionen un wiederen Uttuusch in Lüttgruppen.
Intritt free | Anmellen per Mail an info@lzn-bremen.de.
Mayte Veenstra – Akustikset op Westfreesch (25. Oktober 2025, vun 20:15 an)
Mit ehr Kunzert in’t Zentrum för Kunst bringt de nedderlannsche Sängersche Mayte Veenstra de Regionalspraak Westfreesch in en gefühlvulle Akustikset na Bremen. Mit ehr Leed ‚It dunset yn my‘ hett de junge Musikersche in düt Johr al den Songcontest „Liet 2025“ wunnen. Twüschen sachte Melodien un hardere elektroonsche Elemente schaapt Mayte sik en ganz egen Sound.
Intritt free | Anmellen per Mail an info@lzn-bremen.de.
