Junge Lüüd för Plattdüütsch – Online-Warksteed to plattdüütsche Literatur

De plattdüütsche Literatur hett en lange Geschicht un Traditschoon. Middewiel gifft dat ok bannig veel Böker för de Lütten un ok en Barg an ne’e Literatur – man wat leest junge Lüüd un wat wullt se geern för en literoorsch Anbott hebben?

Üm plattdüütsche Literatur dreiht sik dat an’n 6. Dezembermaand 2022 bi en ne’e Online-Warksteed. Dorto laadt de Bunnsraat för Nedderdüütsch un dat Nedderdüütschsekretariaat hartlich junge Lüüd bet 40 Johr in. Wat leest ji geern allgemeen, un wat dorvun op Platt? Sünd de plattdüütschen Texten wat för jo oder gefallt jo de Böker un de Themen dorin nich? Un över wat schrievt junge plattdüütsche Schrieverslüüd?
Uns Gäst sünd Arne Lentföhr, en jungen plattdüütschen Schriever vun Lyrik, de jüst mit den Borsla-Pries uttekent worrn is, un Florian Wille, de junge Baas vun den Bund för nedderdüütsche Autoren in Rostock un ok sülvst Schriever.
Villicht schrievt ji ok geern un möögt jo mit anner junge Schrieverslüüd vernetten – mag ween, en Lees-Kring för plattdüütsche Literatur mit anner junge Lüüd weer wat för jo? Wi freit uns op jo Ideen un Vörslääg un den Uttuusch!

Wokeen dat Thema intresseren deit, de kann ok geern bi uns lütte Ümfraag mitmaken, de wi för de Warksteed anleggt hebbt, dat een sik al vör dat online-Drapen en beten mit dat Thema utenannersetten kann: https://easy-feedback.de/umfrage/1568967/w0S9zr.

Junge Lüüd bet 40 Johr sünd hartlich inlaadt – tohören un uttuuschen!
  • Wokeen dat utrichten deit: Bunnsraat för Nedderdüütsch un Nedderdüütschsekretariaat
  • Anmellen un Nafragen: per Mail an: info@niederdeutschsekretariat.de
  • Frist för’t Anmellen: Maandag, 04.12.2022
  • Datum un Tiet: Dingsdag, 06.12.2022, Klock halvig 7 bet Klock 8
  • Wo wi dat maakt: online, Zoom-Link kümmt över ‘n Mail