+++Inladen to en Online-Warksteed to dat Thema Spraakutbo un dat Finnen vun ne’e Wöör vun de SASS-Redakschoon+++
Leve Lüüd,
mit över 180.000 Indrääg is dat Plattdüütsche Nettwöörbook na SASS för dat Noordnedderdüütsche vun Heinrich Thies (1938–2023) in’n September 2022 online gahn. Rutgeven warrt dat Wöörbook vun de Fehrs-Gill, finantschelle Stütt kriggt dat Projekt vun’t Land Sleswig-Holsteen. Na Heinrich Thies sien Dood hett sik in’n Juli 2024 de SASS-Redakschoon an de Universität Flensborg grünnt. Ehr Opgaven sünd dat Plegen un Aktualiseren vun den Woortbestand, de al in’n SASS steiht, as ok de Vereenheitlichen vun de Schrievregelns un de Spraakutbo, wo ne’e Wöör för ne’e Konzepten funnen warrn mööt. Över de E-Mail-Adress redaktion@sass-platt.de kann jeedeen Kontakt mit de Redakschoon opnehmen, egen Wöör vörslaan oder ok Torüchmellen to utbote Wöör geven.
An’n 10. Dezember 2025 vun Klock viddel na söss bet viddel vör acht (18.15–19.45) veranstalt de SASS-Redakschoon en Online-Warksteed to dat Thema Spraakutbo un dat Finnen vun ne’e plattdüütsche Wöör. All Lüüd, de dat Thema intresseren deit, sünd vun Harten inlaadt.
Wi stellt uns un uns Arbeit vör un wiest, wat för Wöör al ehr Weg in dat Wöörbook funnen hebbt. Dor sünd Wöör mang, de villicht egentlich al wat öller sünd, so as „Knickpleeg“ oder „Suutjigkeit“, man ok ne’e Wöör för ne’e Konzepten, so as „Kunstklookde“ för „künstliche Intelligenz“ oder „Togbusverkehr“ för „Schienenersatzverkehr“.
Wi wüllt den Kontakt mit Se/Jo söken un uns över de ne’en Wöör uttuuschen un över de ehr Döög för den Alldag, dat Snacken un Schrieven snacken. Villicht hebbt Se/Ji ok Vermaak un bringt sülvst fief Wöör mit, wo Se/Ji sik nich seker sünd, woans een dat op Platt utdrücken kunn un de (noch) nich in’n SASS staht. Gemeensam kunnen wi bi en Utwahl vun Wöör denn diskereren, woans se sik op Platt ümsetten leten.
Mellt Se sik doch geern bet to’n 9. Dezember 2025 bi redaktion@sass-platt.de an.
De Redakschoon freit sik över elkeen Deelnehmersche un Deelnehmer.
Hartlich Gröten vun de SASS-Redakschoon!
Robert Langhanke för de Redakschoon
