3. Hamborger Plattdüütsch Dag – dat weer di wat!

Foto: Katharina Fegebank, Twete Börgermeisterin vun de Fre’e un Hansestadt Hamborg

De Plattdüütschroot för Hamborg kickt trüch op den 3. Hamborger Plattdüütsch Dag.

Na 2016 un 2018 kunnen wi na veer Johr an’n 23. April endlich den 3. Hamborger Plattdüütsch Dag fiern. Inlaadt harr de Plattdüütschroot för Hamborg wedder Verene, Initschativen un all möglichen Kulturinrichtungen. Se hebbt all mitmaakt un in ganz Hamborg vun de Binnenstadt bet meist ganz butenstadts mit üm un bi 40 Föhrungen, Vördrääg, Vörlesen, Theater und Comedy dorför sorgt, dat een Plattdüütsch överall hören, sehen un beleven kunn. Dat weer Plattdüütsch satt – för jeedeen wat!

Velen Dank an Katharina Fegebank, de Twete Börgermeisterin vun de Fre’e un Hansestadt Hamborg. Se weer ok düt Johr de Schirmherrin vun den Plattdüütsch Dag. Wi bedankt uns bi all, de bi uns Plattdüütsch Dag mitmaakt hebbt. Mit all dat, wat Ji Jo utklamüüstert, wiest un maakt hebbt, warrt so’n Plattdüütsch Dag eerst möglich. Un düchtig bedankt wi uns ok bi all, de uns ünner de Arms grepen hebbt. Ahn Jo Medienpartnerschop, Geldsprütten un Raat un Hölp harrn wir uns Plattdüütsch Dag nich trecht kriegen kunnt.

Medienberichten:

De Hamborger Plattdüütsch Dag 2022 – maak di en Bild dorvun! Op de Siet vun’n Plattdüütschroot gifft dat en poor Biller vun den Dag to sehn.

Text un Bild: Plattdüütschroot för Hamborg