„Wi waagt en Blick in de Tokumst un över de Grenz“ – ünner dat Motto harrn de Bunnsraat för Nedderdüütsch un dat Nedderdüütschsekretariat to en „Soirée för Platt“ an’n 15. Juli 2025 na dat Museumsdörp in Cloppenborg inlaadt. Twüschendör sünd twoors ok de Nadelen vun so en Freelichtmuseum düütlich worrn, as dicke Schuern över dat Museumsdörp trocken un wiest hebbt, wat en richtig „Schietwedder“ is. Liekers hebbt vele Gäst den Weg na de Veranstalten funnen.
An’n Anfang hett Arnold Beuke, Leider vun den Beriek Sammeln un Dokumentatschoon in’t Museumsdörp, spontan sien Plattdüütschkenntnissen ruthaalt un de Begröten op Platt maakt. Heinrich Siefer, Spreker vun’n Bunnsraat för Nedderdüütsch, bedank sik bi’t Museumsdörp Cloppenborg, bi’t Bunnsbinnenministerium un bi de Ollnborgsche Landskupp för Stütt un Stöön för de Veranstalten.
Los güng dat mit en Reeg Impulsen to dat Nedderdüütsche un sien Tokumst. Toeerst hett Christiane Ehlers, de dat Nedderdüütschsekretariat leidt, de Wannerutstellen „Was heißt hier Minderheit?“, de jüst to Gast in’t Museumsdörp is, vörstellt. Se stell rut, wat för en Bedüden de Utstellen för de Opkloren över de fief autochthonen Gruppen in Düütschland hett. Denn hett Dr. Saskia Luther, Delegeerte för Sassen-Anhoolt in’n BfN, en Överblick geven, wat spraakpolietsch opstünns anliggen deit – vun Lobbarbeit in Berlin bet hen na de Wetensvermiddeln över Platt un de Minnerheiten in Scholen. In den neegsten Bidrag güng dat üm de Initschatiev „Spraakplaan Nedderdüütsch 2050“, de de BfN un dat Nedderdüütschsekretariat in’t Leven ropen hebbt. Kevin Behrens un Christiane Ehlers hebbt de Arbeit för en Spraakplaan Plattdüütsch vörstellt. Düt Johr loopt twee Modellprojekten to de Prestieschplanen: Dorför sünd mit dat Ollnborger Münsterland un Sassen-Anhoolt twee verscheden Plattregionen utkeken worrn. En Schoolfack Plattdüütsch – en Thema, mit dat de BfN sik al vele Johren uteneen setten deit. Marianne Ehlers, Delegeerte in’n BfN för Sleswig-Holsteen, stell dat Modellscholenprojekt in’t nöördlichste Plattdüütschland vör – en Lüchttoornprojekt, wat de Vermiddeln vun de Spraak angeiht. In Neddersassen sünd se jüst bi, de Grundlagen för en Schoolfack hentokriegen. In den letzten Bidrag güng dat denn noch üm Wetensvermiddeln över de Regionalspraak Plattdüütsch un de veer Minnerheiten in de School.
De musikaalsche Hööchpunkt vun de Soirée weer dat Konzert vun Otto Groote un Bert Hadders mit dat Brückenbauer Ensemble. Tüschen de Leder hebbt de beiden Muskanten ut Oost- un Westfreesland vun ehr persöönlichen Spraakwutteln un den bewussten Ümgang mit Mehrsprakigkeit in ehr Musik vertellt. Jüm ehr Moderspraak verbinnt de beiden – ok över en Lännergrenz weg.
Achteran kunnen de Besökers de Wannerutstellen „Was heißt hier Minderheit?“ ankieken un blangen de Plattdüütschen de Dänen, de Fresen, de Soorben un de Düütschen Sinti un Roma kennenlehren. Bi Natt un Dröög weer denn noch de Mööglichkeit sik uttuuschen – natürlich nicht blots över Platt, man ok op Platt! So bood de Avend blangen Vördrääg un Musik ok Ruum för Gespräken över de Rull vun Plattdüütsch in de Nutiet un in de Tokumst.
Stütt geven för de Veranstalten hett dat:
