„Thinktank“ Nedderdüütsch hett sik bemött

An’n verleden Sünnavend, d. 22.10.2022 hett de “Thinktank” ünner dat Leid vun’t Nedderdüütschzentrum Holsteen stattfunnen. In de nedderdüütsche Biblioteek vun de Carl-Toepfer-Stiften sünd knapp 20 Lüüd in de Mööt kamen, de ut verschillene Rebeden vun de nedderdüütsche Szeen man ok vun extern kaamt. Dorbi weren Lüüd ut den Theaterberiek, ut de Gamingwelt, ut dat Kulturrebeed vun Nedderdüütsch, welke sonöömte Plattfluencers, de bi Instagram un annerwegens mit plattdüütsche Inhoolden aktiv sünd, man ok de jungen Lüüd ut den Bundesraat för Nedderdüütsch un ok anner Liddmaten. Schöön to sehn weer, dat ok heel externe Lüüd dorbi weren, de avers desülvigen Malen verfolgt un mit anpacken wüllt. Alleen as Vernettensdrapen is de Thinktank en hele Spood ween. Vele vun de Lüüd hebbt sik twoors kennt uout de Szeen man noch nienich sehn. Stantepe sünd also Kuntaktinformatschonen uttuuscht worrn, mit dat faste Löövnis, dat een ok achterna in’n Kuntakt blieven schall. Dat geev ok twee anner nömensweerde, positive Tekens: Dat Döörsnittsöller weer sünnerlich sied, de mehrsten weren also noch jung. Un dat anner, dat mooi to sehn weer, de hele Tiet is ahn Utnahm (bet op een Passivsnacker) op Platt snackt worrn. De Spraak weer also op en heel natüürliche Maneer de Verkeers- un Arbeitspraak mang de Deelnemers:chen.
Na en allmene Vörstellensrunn un en Inföhren, wat de Achtergrund un dat Teel vun düssen Thinktank is, hebbt wi uns kott över Nedderdüütsch an sik uttuuscht un wo de groten Problemen vun de hüdige Tiet ut bestaht un wat de Hööftpunkten un -vörutsettens för dat Wiederbestahn vun de Spraak sünd. Wi hebbt denn fastleggt, wat wichtige Themen ween kunnen för dat Diskereren achterna. Denn hebbt wi uns in dree Gruppen opdeelt. Elke Grupp hett sik egen, themaatsche Diskuschoonspunkten utsöcht, över de een snacken wull. Achteran sünd wi in de grote Runn wedder tosamenkamen un elk Grupp hett ehr Punkten un Insichten mit all deelt. Düsse Punkten sünd nochmal diskereert worrn un wi hebbt gau markt, dat egens elkeen op datsülvige Tapeet stünn. De Jungen Lüüd hebbt ok versöcht, de Arbeit vun dat Nedderdüütschsekretariaat un den Bundesraat för Nedderdüütsch to verkloren, wieldat vele gor nich över de Existenz oder den Opgavenberiek wies weren.
Hierna geev dat en Stärken mit en mediterraan Middageten. Man ok wielst dat Eten güngen de Diskuschonen wieder un een kunn sik privat wieder uttuuschen un sik vernetten. Thorsten Börnsen, de dat Leid vun dat Nedderdüütschzentrum Holsteen un den Thinktank hett, geev uns denn en lütte plattdüütsche Stadtföhren dör de Neestad vun Hamborg un dat Viddel un hett uns wat över de Geschicht dorvun vertellt. Düsse Afwesseln dee goot un een kunn sik jümmers mit verschillene Lüüd middenmang uttuuschen un sik noch beter kennenleren. An’t Enn vun’n Dag hett een sik egens tominnst eenmal mit elkeen ünnerholen.
As wi torüchkemen, hebbt wi de twede Diskuschoonsrunn maakt, wo wi wisse Themen in twee Gruppen opdeelt hebbt, üm de wieder uttoboen. Op de Agenda stunnen Festivals, Frömdspraakverwarv, en Manifest för wat de Plattdüütschen vun de Regeren wüllt, wodännig een sik mit anner plattdüütsche Aktörschen un Aktören vernetten kann, woans een Veranstalten un Informatschonen zentraliseren un beter uttuuschbaar maken kann, wo sik mehr Synergie twüschen de Institutschonen un aktive Lüüd opstellt warrn kann, un op welke Maneer een dat Överregionale mit dat Regionale övereenbringen kann.
In de letzte grote Gruppenrunn hebbt wi düsse Themen noch deelt, kott besnackt un denn dat wiedere Vörgahn plaant. Wieldat wi markt hebbt, wo veel een op so en Drapen beschicken kann, hebbt wi glieks seggt, dat wi in’n tokamen Maand en Online-Drapen maken wüllt. Wi wüllt ok noch wiedere Drapens in “echt” afholen un wi wüllt över en meensamen Online-Beriek tohoop arbeiden. Dor wüllt wi an en meensam Manifest arbeiden, wo wi de Wünsch un Föddern vun de Plattdüütschen heel düütlich kummenizeert, un ut de verschillenen Berieken tosamendregen, wodännig sik dor de Laag vun Plattdüütsch verbetern lett.
Wi sünd dor also mit en goot Geföhl un en Reeg Saken rutgajn, de wi anstött hebbt, un en determineert Ansinnen, de Saak gründlich, bestimmt un gau antogahn. Dor schall noch veel bi rutsuren.