Vun’n 23. bet to’n 24. Augustmaand hett de Bunnsregeren ehr Dören apenmaakt un jeedeen harr de Schangs, dat polietsche Berlin kennentolehren. Mit dorbei weren ok de Bunnsraat för Nedderdüütsch un dat Nedderdüütschsekretariat: Tohoop mit dat Minnerheitensekretariat un de AGDM – Arbeitsmeenschop vun de Düütschen Minnerheiten in de FUEN harrn wi en Informatschoonsstand in’t Bunnsbinnenministerium. En Barg Lüüd hebbt vörbikeken un sik över de Regionalspraak Nedderdüütsch informeert – un ok in Berlin hebbt wi vele Plattsnackers drapen!
De Besökerinnen un Besökers weren bannig intresseert an uns Informatschoonsmaterialien: De Broschüren över Plattdüütsch, över den Spraakutbo, dat Sichtbormaken vun Platt oder ok Plattdüütsch as Familjenspraak sünd veel mitnahmen worrn. Sünnerlich goot ankamen sünd uns ne’en Postkoorten to uns Imagekampagne PlattLandLüüd op Instagram. Wokeen nich in Berlin dorbi weer, de kann de Postkoorten ok in’t Nedderdüütschsekretariat ordern, kosten doot se nix.
Denn kunnen de Lüüd in uns Quizz ehr Weten över de Regionalspraak Nedderdüütsch un de natschonalen Minnerheiten in Düütschland testen un hebbt dat een oder anner dortolehrt.
Freit hebbt wi uns, dat Bunnsbinnenminister Alexander Dobrindt un Staatssekretär in’t BMI, Hans-Georg Engelke as ok de Beopdraagte vun de Bunnsregeren för Utsiedlerfragen un natschonale Minnerheiten, Dr. Bernd Fabritius uns Stand besöcht hebbt. Wi bedankt uns, dat wi de Gelegenheit kregen hebbt, uns un uns Arbeit in Berlin to präsenteren!
Fotos: Gruppenbild mit Hans-Georg Engelke: Minnerheitensekretariat, all anner Biller: Nedderdüütschsekretariat
