Werner Momsen, de plattdüütsche Popp mit den Buscherump, un Helge Albrecht sünd hier in'n Noorden tohuus. För jüm höört Plattdüütsch to'n Alldag dorto. Man mitünner kann een dor ok teemlich Last mit hebben, to'n Bispeel, wenn dat üm de moderne Technik geiht. Dor hebbt de beiden annerletzt över snackt. Aver ok över dat, wat Plattdüütsch för jüm bedüden deit. Wat se för Ideen hebbt, Platt in de grote Welt to bringen - oder tominnst bet hen na Berlin. Un wat Plattdüütsch mit de Europääsche Sprakencharta to doon hett.
De Idee to den Film harrn de Bundesraat för Nedderdüütsch un dat Nedderdüütschsekretariat. Dat Geld geven hett de Beopdragde vun de Bunnsregeren för Kultur un Medien. Den Film dreiht hett Frischer Film ut Hamborg. Stütt geven hett dat Ohnsorg-Theater.
