Moin, mien Naam is Nina un ik bün in Hamborg groot worrn. In mien Familie hett blots mien Oma af un to Platt snackt. Man ok mien Schoolmeester hett uns de nedderdüütsche Spraak as en Hamborger Kultur mitbröcht, as wi plattdüütsche Leder sungen un Määrken op Platt leest harrn.
Nu leev ik siet veer Johren in Kiel un studeer dor Düütsch un Nedderdüütsch. Twischen beide Bunnslänner heff ik een groten Ünnerscheed feststellt, wat dat Intress an de plattdüütsche Spraak angeiht: In Hamborg heff ik blots af un to mal een poor Wöör op Platt höört un vele Lüüd wüllt dat nich geern snacken. Man in Schleswig-Holsteen sünd de Lüüd heel stolt op de Spraak un ik heff een poor Frünn in mien Öller kennenlehrt, de sogor op Platt upwussen sünd. Un de annern, de nich vun Huus ut Platt snacken doot, de weren tominnst heel an‘t Plattsnacken intresseert. Besünners is mi ok upfullen, dat dat in Kiel cool is, wenn ik op Platt snacken do, wo ik in Hamborg ünner mien Frünnen blots scheef ankeken warr.
Ik heff jümmers een Begeistern för Spraken hatt un natürlich ok för Plattdüütsch, wat för mi na Heimat klingt. Mi is dat en Anliggen, de Spraak wedder mehr ünner de Lüüd to bringen un dorför de Arbeit vun dat Nedderdüütschsekretariat to ünnerstütten as ok achter mien Studium den Snack trüch to de Kinner in Ünnerricht to bringen. Ik hoff, dat dat Nedderdüütsche so wedder öfter in de Köpp un villicht sogar in’n Alldaag kümmt – un vör allen, dat Platt wedder cool is!
