Junge Lüüd bemööt Natalie Pawlik, MdB

An'n 17. Juni hett de Beraden Utschuss in Hamborg steedfunnen. Dat hebbt wi as Anlaat nahmen un en poor junge Lüüd inlaadt, de sik vör den Utschuss mit Natalie Pawlik, MdB, de Beopdraagte för Utsettlerfragen un de natschonalen Minnerheiden, drapen hebbt. Jöögdarbeit is ehr bannig wichtig un dorso weer dat en teemlich passliche Tosamenkumst. Dorbi weren Natalie Pawlik sülvst as ok dree vun ehr Mitarbeiders*chen, Christiane Ehlers, de Leidersche vun't NdS, Heinrich Siefer, de Spreker vun'n BfN, un acht vun de jungen Lüüd un ehr Vertreders in'n Bunnsraat för Nedderdüütsch. Toeerst hebbt wi twee künstlerische Bidrääg höört. Lucia-Philtje Gerst hett twee vun ehr Geschichten vörstellt. Een hett se al op uns Literatur-Warksteed vörstellt. De anner is mang de besten 25 Geschichten bi den Schrievwettstried "Vertell doch mal" kamen. Gesche Gloystein, de mang anner Poetry Slams schrifft, hett en Slam för all vördragen.

Achterna sünd wi in't Gesprääk mit Fro Pawlik kamen, indat wi bestimmte Themen vörstellt un diskereert hebbt, dormit düütlich warrt, wat uns as junge Lüüd sünnerlich wichtig is in de Spraakpolitik. Düsse Themen hebbt wi in en Online-Drapen vörher afsnackt. Wichtig weer uns in eerste Lien för allen de Stand vun Plattdüütsch an de Scholen, Kinnergoorns, Utbillens un in't Studium. De mehrsten vun de jungen Lüüd hebbt sik op de een oder anner Wies an de Uni op Nedderdüütsch qualifizeert oder spetschaliseert. Man mit düsse Düchtigkeit köönt se sik narms so recht profileren, wieldat de Scholen sowat nich sünnerlich utschrievt. Dat bruukt en beter Nettwark för de Nedderdüütschqualifikatschoon an de Unis un achterna dat Vermiddeln an Scholen. Datsülvige bedröppt ok de Utwussenenbillen, wo dat eenfack to wenig Anbott gifft för Utwussenen, sik Platt as Tweetspraak antoegen.

Wieders güng dat ok üm Kultur un Literatur, wat twee Berieken sünd, wo dat noch jümmers doran mangelt, dat sik hier en Profeschonaliseren över Platt instellt hett. Dat gifft keen zentrale Vermiddelnsstruktur för plattdüütsche Acts, wenn en Veranstalten so een söcht. Ok sleiht dat faken fehl, wenn junge (oder natüürlich ok öllere) Lüüd en lütter Projekt ümsetten wüllt, man keen Finanzeren dorför finnt. Dat, wat welke Institutschonen as de Landschoppen in Neddersassen an Kultur stöönt, is faken mit vele Bedingens verbunnen: een mütt ut de Region kamen, wisse Anfödderns utfüllen, dat Halve vun de Finanzeren sülvst stütten un nich allens lett sik finantschell ümsetten. De jungen Lüüd wünscht sik also en Kulturfonds, ut den lüttere Projekten aan veel Bürokratie un ok överregional ümsetten laat, hier höört ok to'n Bispell Bookverapentlichens, de faken daaran malöört, dat en Verlag keen plattdüütschen Inhoolt rutgeven will, de sik an en jünger Publikum richten deit.

Wi hebbt denn noch uns Broschüür för junge Öllern vörstellt, de Tipps mit an de Hand gifft, wenn een Unsekerheiden hett, wat en tweesprakige Optrecken mit Düütsch un Platt goot is oder nich. Vun de Problemen un Unsekerheiden hebbt wi ok snackt mit Fro Pawlik un anmarkt, dat dat hier meist gor keen Stütt gifft, üm Platt wedder in de Familjen to bringen, jüstemang dor, wo dat op't wichtigst is.

Hier höört ok uns letzt Ansinnen to, dat dat Prestige oder Image vun Platt is jümmers noch dor, wo wi dat hebben wüllt. Twors is dat nich mehr so negativ, as dat dunn mal weer, man jümmers noch gifft dat Lüüd, de vun negativ Stigma bericht, oder tominnst vun en liekgüllig Holen gegenöver de Spraak. Platt as Schinkelklopperspraak, Platt as en Spraak, de nich över Plüüschmoors rutkümmt, oder Platt op dat een nich över Wetenschop snacken kunn, dat een blots mit de Muddermelk opsuugt hebben mütt oder dat een nich schrieven un blots snacken kann, dat sünd Saken, de een jümmers noch ut den Weg rümen mütt. Sülvst in de Politik wiest sik düsse Vöroordelen; Platt is denn en Dialekt, oder en Spraak, de een nich schulen mütt, se warrt as eenzig Regionalspraak in Düütschland mang de autochthonen Spraken jümmers vergeten un se snackt blots vun de "natschonalen autochthonen Minnerheiden", Sprakenpolitik in Düütschland sluut denn faken Plattdüütsch ut, ofschoonst mehr as 2 Milljonen Lüüd dat snacken doot. Hier kunn een wunnerbor mit en Imagekampanje oder mehr Opkloren gegenan gahn.

Fro Pawlik un ok ehr Mitarbeiders*chen hebbt ok Trüchfragen stellt un hebbt sik sichtlich för de Themen intresseert. Stedenwies is ok kloor worrn, dat se welke Saken gor nich wies weren, dat weer also goot, dat wi tohoop doröver snackt hebbt. Bi en Sprakenpolitik dörvt de jungen Lüüd nich vergeten warrn, se sünd jüstemang de Generatschoon, de de Spraak in de Tokumst dregen warrt. Wi schöölt afsehn, wat ut düsse drange Arbeit mit de jungen Lüüd tosamen warrt.