„Ein Läben ahn Plattdüütsch kann ik mi gor nich vörstellen.“

Johanna Bojarra, 32 Johr, Rostock

Wat för en Bedüden hett dien Moderspraak för di un wat gefallt di an de Spraak?

Mien Mudding is all mit de plattdüütsche Sprak upwussen un sei hett ehr Muddersprak an mi wierergäben. So heff ik all as lütte Diern mit drei Johren anfungen Platt tau schnacken. Ein Läben ahn Plattdüütsch kann ik mi gor nich vörstellen. Dat hürt einfach dortau. De Sprak is ihrlich un klor un hett so väl wunnerbore olle un niege Wür. Ok de Sprakmelodie is ganz besünners. Wenn ik ein Plattdüütschschnacken hür, ward mi glieks warm üm mien Hart.

Wat för Vör- un Nadelen harr dat för di mit Plattdüütsch as Moderspraak groot to warrn?

Ik bün mit twei Spraken upwussen, mit Hoch- un Plattdüütsch. So harr ik in de Schaul keine Probleme, denn Lihrer un de Mitschäuler tau verstahn. Schad wier blots, dat keinein von mien Frünnen Platt schnackt hett. Egentlich hett mi de plattdüütsche Sprak ümmer hulpen un ik heff blots positive Erinnerungen doran. Wenn ik as lütte Diern up de Bühn stünn un wat Plattdüütsches upsecht heff, hebben sik de Lüd freut. As ik miene Facharbeit up’t Gymnasium un ok de Bachelorarbeit an de Fachhochschaul œwer plattdüütsche Themen schräben heff, wier dat ok wat Besünners un niech för de Lihrer un Dozenten. Ok wenn ik as Erzieherin mit de Kinner plattdütsche Gedichte und Leeder för de Öllern un Grotöllern upführt heff, wier de Freud grot. Künn ik kein Platt, harr ik woll nie nich de Möglichkeit krägen, bi dat Projekt „Heimatschatzkist“ von denn Heimatverband Mäkelborg-Vörpommern mittaumaken. So kann ik seggen, dat mi de plattdüütsche Sprak väle Dören upmakt hett.

Woans giffst du dien Moderspraak wieder?
Marita un Johanna Bojarra

As Erzieherin in’n Kinnergorden schnack ik mit de Kinner in Olldach Platt un bring ehr lütte Rimels und Leeder up Platt bi. Bi miene Arbeit bi denn Heimatverband Mäkelborg-Vörpommern wier ik för dat Projekt „Heimatschatzkist“ verantwuurtlich. Dor heff ik Fuurtbillungen dörchführt un de pädagogischen Fachkräft 'n bäten Plattdüütsch bibröcht. Mien Mudding un ik hebben 2017 dat Billerbauk „Plattdüütsch mit Lütt-Mariken“ rutbröcht. Dor lihrn Grot un Lütt ierste plattdüütsche Wür, lütte Rimels, 'n Fingerspäl un 'n Schlapleed up Platt. 2020 heff ik denn tausamen mit mien Fründ de Internetsiet www.luett-mariken.de veröffentlicht. Dor find ein nich blots Informatschonen œwer de plattdüütsche Sprak un plattdüütschen Schnack, dor is ok 'n plattdütsches Online-Würbauk tau finnen. Siet teihn Johren späl ik bi de Nedderdüütsche Bühn Rostock mit un bün dor ok de Bühnenvetreterin. Wenn niege Mitspälers dortau kamen, bringen wi sei ok Plattdüütsch bi.

Woso un woans settst du di för dien Moderspraak in?

De plattdüütsche Sprak is ein Stück von mi un von miene Heimat. Mi is dat bannig wichtig sei tau erhollen un tau plägen. In M-V gifft dat leider nich mihr so väle Plattschnacker, de so olt sünd as ik. Ofteins sünd dat blots noch de Ollen, de Platt schnacken. Dat möt sik wedder ännern. Näben all de Saken, de ik bi de vörrig Fraach all secht heff, bün ik siet Oktober 2020 ok bi denn Bundesraat för Nedderdüütsch as ein von twei Delegierten ut Mäkelborg-Vörpommern un kann mi dor för de plattdüütsche Sprak insetten.

Wo mutt Plattdüütsch ut dien Sicht hoochnöödig Stütt kriegen?

Ik find dat ganz wichtig, dat wi bi de Lüttsten anfangen. De Kinner hebben so väl Spaß an niege Saken. Se hebben Lust Platt tau lihrn. Un dat gifft so väl Möglichkeiten, woans man de Kinner Platt bibringen kann. Nich mit Vokabels lihrn, sünnern spälerisch. Dat lött sik ok mit wenig Mäuh in denn Olldach inbugen. Dat fangt in de Kitas an un möt in de Schaulen wierergahn. För all disse Saken bruken wi œwer Erzieher un Lihrer, de Platt schnacken un wierergäben können. Dor is nu de Politik fraacht, sik wiererhen dorför intausetten un sik noch mihr Angebote tau œwerleggen.

Wat för en Raatslag giffst du Minschen, de Plattdüütsch lehren wüllt?

In’t Internet, up Youtube, Facebook un Instagram gifft dat wunnerbore Sieden, Videos un Podcasts tau’n Plattdüütschlihrn. Ok in’t Radio un Fiernseihn gifft dat plattdüütsche Sennungen tau‘n Anhüren un Ankieken. Allerbest is œwer, wenn ein sik 'n Plattdüütschkrink, 'ne plattdüütsche Theatergrupp orrer anner Plattschnacker söcht un von de Profis lihrt. Ein möt sik mit Platt ümgäben. Wenn du de Sprak ümmertau hürst, kümmt dat Schnacken ganz fix von ganz allein. Un wichtig is: Truuch di! Dat is gor nich schlimm, wenn du ein Wuurd eins anners utschnackst. Dor helpen di denn de Plattschnacker wierer.