Nee anfangen deit bi uns Maike Vorholt, en Dokterandsche in Linguistik vun de Uni Bremen. Schöön, dat du bi uns büst! Stell di uns doch even vör:
Mien Naam is Maike un ik kaam ut Bremen. Ik heff Spraakwetenschop an de Uni Bremen studeert un nu arbeid ik an de Uni Bremen in dat Malta-Zentrum. Ik schriev mien Dokterarbeit över Malteesche Präpositschonen. In mien Freetiet bün ik geern buten oder ik danz Irish Dance.
Miene Grootöllern hebbt af un to Platt snackt. Besünners mien een Gootvadder wenn he ut sien Kinnertiet vertellt hett. Aver ik heff Platt blot passiv lehrt. Dör mien Kolleeg Kevin bün ik nu weer mehr op de Spraak upmarksam worrn un as Spraakwetenschopperin is mi dat wichtig, dat Spraken behollen blievt.
Ik finn, in de Apenlichkeit hett Platt meist de Rull as Touristenattraktion. Dat is woll ok nett, aver ik fünn dat schöner noch mehr vun de Spraak to sehn besünners in anner Kontexten. Ik glööv „lütte“ Spraken kriegt intwüschen weer mehr Opmarksamkeit in de Sellschop un dat is en groot Mööglichkeit för Platt wedder en grötteren Platz intonehmen. Ik hööp, dat dat in 25 Johren weer normaler is, Platt in all Rebeden vun de Sellschop to sehn, to bruken un to hören. Dör de Arbeit in dat Nedderdüütschsekretatiat heff ik de Mööglichkeit dar mittowarken. Dat finn ik ganz spannen!
