An'n 31.01.2026 hett dat eerste Nettwarkdrapen vun de Jungen Lüüd steedfunnen. Op de Inladen sünd üm un bi 20 Lüüd fulgt un kemen tosamen in't Institut für niederdeutsche Sprache (INS). Op't Tapeet stünn en Barg Programmpunkten för dat Johr 2026. Dat Maal is, de Arbeit vun Junge Lüüd organisatoorsch beter un struktureerter optostellen. Dorso hebbt wi en Drapen in live ansett. (För en poor Indrück, kiek di uns Instagram-Reel an!)
Man toeerst hebbt wi uns alltohoop kennenlehrt, wieldat bannig vele ne'e Gesichter dorbi weren. De Lüüd kemen ut heel Plattdüütschland|Sassenland, vun Mekelnborg-Vörpommern bet na Nedderland, vun Sleswig-Holsteen bet na Westfalen, vundor weer kloor: de lingua franca is Plattdüütsch1, wieldat nich all Düütsch snacken kunnen - un dat leep wunnerbest. Achterna hett Nele Otten uns en Tour dör dat Institut geven un en Reeg Saken över de Arbeit, Opgaven un ok Rutfödderns vun't INS vertellt. Torüch in de grote Grupp güng dat mit dat Sinneren los to de groten Themen för den Dag, op de een Siet de polietsche Arbeitsfokus för 2026 un op de anner Siet de Nettwarksarbeit un Form vun een Sik-Organiseren.
Op de Fraag, wo sik de Politik för junge Lüüd op fokusseren schall för't Johr 2026, geev dat grote Övereenstimmen. An vörste Steed stünn dat mediale Anbott. Dat gifft keen Utrichten op junge Lüüd un al so is de Meng vun Inholen bannig siet, sodat junge Lüüd blots de Mööglichkeit hebbt, Medien op de se Vermaak hebbt, op Düütsch oder even Nedderlännsch to kunsumeren. Ok en Wetensvermiddeln, op wat för en Oort ok: in Form vun Videos/Podcasts in't Internett, op Schiller/Audiotouren in en Museum oder as Saakböker oder Ünnerrichtsinhoolt in de Scholen, gifft dat meist gor nich op Platt. De Jungen Lüüd wünscht sik betere Mechanismen, de düssen Scheefstand verbetern köönt: en Plattdüütschquoot för de apentlich-rechtlichen Rundfunkanstalten, Junge Lüüd-Vertreders in de Rundfunkrööd vun de Länner, mehr Geller för profeschonelle Medienanbotten, en Font för Institutschonen as Museen för de Översettens un Ümsettens vun de Spraakoptschonen Platt, dat Inbinnen vun junge Lüüd in de Utstalten vun de Medien un en grötteren Fokus op de sotschalen Medien.
Bi Nedderland is dat Problem, dat dat för Neddersass'sch blots Deel II vun de Europääsche Charta för Regional- oder Minnerheitenspraken ünnertekent hett. Bavento gifft dat keen zentral Organ, dat de Sprekergrupp vertreden un de neddersass'sche Spraakpolitik vörandrieven deit, wat dorto föhrt, dat de Geller för Spraakprojekten nich sekerstellt sünd un somit keen Plaanborkeit mööglich is. De Jungen Lüüd wünscht sik hier mehr Hanneln un betere Weeg för en egen Partizipatschoon.
Wo wi dat wieders över harrn, dat weer de strukturelle Arbeit vun de Jungen Lüüd. Bruukt dat en Nettwark un woans kunn so een utsehn? Wat sünd Saken, de ee goot över en Nettwark beschicken kann? Dat sünd Fragen, mit de de Lüüd in Lüttgruppen gahn sünd un heel intressante Punkten vördag bröcht hebbt. So hett sik wiest, dat se op jeden Fall Intress un Berief an en Nettwark hebbt. In all Gruppen keem op, dat de beste Weg för dat Nettwark woll över den Kommunikatschoonsdeenst Discord (Lenk na'n Neddersass'schserver) is, WhatsApp levert to wenig Warktüüch un Mööglichkeiten hierför. Över en Nettwark kann een ok sülvst Inholen in Afspraak opstellen, so as lütte Videos to verscheden Themen in'n Wessel un de op en Onlineplattform vörstellen. Bavento kann een sik so uttuuschen to verscheden Projekten, de an't Lopen sünd, sodat een dat Swarmweten antappen kann.
Veel vun de Anwesigen harrn Lüst, bi en organiseertere Struktur vun de Jungen Lüüd mittodoon. Dat meent, wenn een dat in en egen Organisatschoon oder wat Liekerhafts överföhren wöör, denn harrn vele Vermaak, ehr Deel bitodregen. De Junge Lüüd-Vertreders:chen in'n BfN hebbt sik op jeden Fall över dat schöne un produktive Drapen mit so veel junge Lüüd freit un föhrt dat nu geern draad wieder.
Wenn du ok twüschen 18 un 35 Johr oolt büst un Lüst hest, di op jichtenseen Oort un Wies bi de Jungen Lüüd to engageren, denn mell di doch geern ünner info@niederdeutschsekretariat.de.
___________
1 Wi bruukt hier de Beteken "Platt/Plattdüütsch" man meent natürlich de hele Spraak Nedderdüütsch/Neddersassisk.
