De Wannerutstellen „Was heißt hier Minderheit“ is jüst in Altno in’t Museum to Gast. So hett dat wunnerbor passt, de Utstellen ok an den 5. Hamborger Plattdüütschdag an’n 18. April in‘t Programm optonehmen. „Över’n Töllerrand kieken – Plattdüütsch in acht Bunnslänner un op de hele Welt“, ünner dat Motto harr de Bunnsraat för Nedderdüütsch intreseerte Lüüd inlaadt, sik de Utstellen antokieken un mit de Lännervertreders in’n Uttuusch to kamen.
En poor vun de Delegeerten ut den Bunnsraat harrn an den Dag Deenst in’t Museum, un dat weer ok goot so. Besünners bi den Stand vun de Plattdüütschen geev dat en Barg Fragen vun de Besökers. Dor kemen welk, de na en Plattdüütsch-Kurs fraagt hebbt. En Mann weer extra vun Brannenborg kamen, üm sik de Utstellen antokieken. Wat en Tofall, he harr mal en Plattkurs bi Heidi Schäfer, Delegeerte för Brannenborg in’n Bunnsraat, maakt! So kemen de beiden gau in’t Snacken. En Ehpoor vertell, dat se al lang bi en Plattkurs in Hamborg dorbi weren un de Spraak nu ok ganz goot snacken kunnen. Dree öller Daams decken sik mit Materiol för jümehr Snackrunn in un weren heel begeistert över den Uttuusch. En Plautdietschen keem ok vörbi – glieks kreeg he den Kuntakt vun uns Delegeerten Heinrich Siemens mit. En Hamborger weer dorbi, op en plattdüütsche Insel to trecken – he wüss noch nich, Baltrum oder Pellworm? He wull op sien olen Daag de See vun‘t Kökenfinster ut sehn. En junge Fro mit en lütt Kind keem vun fröher her ut Russland, snack söss Spraken un harr Spraakwetenschop studeert. Se kenn sik op’t best mit Minnerheitenspraken ut. En Fro söch na en Snackrunn, nadem se en poor Kursen maakt harr. Ok dor kunnen wi Tipps geven.
So güngen de Stünnen in’t Museum gau vörbi – un de Idee, de Lüüd an de Hand to nehmen, weer würklich goot!
Marianne Ehlers, Delegeerte in’n Bunnsraat för Nedderdüütsch
