(PM, Plattradio) De Lannsmedienanstalt Hamborg Sleswig-Holsteen hett PLATTRADIO in’n Dezembermaand 2023 verbaden sien Inhoolden to spreden. Achtergrund is en Verstööt gegen den Grundsatz vun de Staatsfeern. De Lannsmedienanstalt föddert dat Land Sleswig-Holsteen op, sien Födderpraxis op dat Rebeet Regional- un Minnerheidenspraken nie optostellen. PLATTRADIO is nu offline. Dat Konzept för PLATTRADIO keem ut de Sprekergrupp un funn Försprekers in all Landdagsfrakschonen. Dat Land un de Plattdüütsch Stiftung hebbt föddert; de NDR un de OKSH stünnen praat as Kooperatschoonspartners. De Heimatbund geev uns as Arbeitgever en Dack. Söss Maanden lang hett PLATTRADIO arbeidt. Vun September bet na de Merrn vun den Dezembermaand 2023 weer de Redakschoon dääglich op Sennen. So en Medienanbott harr dat för dat Plattdüütsche nie nich vörher geven. Een kann sik vörstellen, dat wi trurig sünd, dat nu (eerstmal?) Sluss is. Man as Redakschoon sünd wi stolt, dat wi wiesen kunnen, wat uns Spraak kann. Uns Anliggen weer: Op Plattdüütsch över Welt un Region berichten un de Spraak utbuen, woneem dat dorför nödig is. Wi sünd all uns Partners dankbar för de Ünnerstütten, de wi bi düt Wark kregen hebbt. Uns gröttsten Dank gellt uns Hörers, de mitfolgt sünd.

Dünnersdag, 23.11.2023, Kl. 18.30 – 20.00

In vele Huushoolden is siet en poor Maanden an’n Fröhstücksdisch mehr Plattdüütsch to hören. Snackt warrt dor nich blots över Alldagssaken, ne, ok över den Konflikt in’n Negen Oosten, so as in’n Gazastremel, de Stormfloot an de Oostsee oder de Gieselnahm an’n Hamborger Flooghaven. Vun’n 1. September af sennt PLATTRADIO maandags bet freedags vun Klock 7 bet Klock 8 op de Wellen vun den Apen Kanal Sleswig-Holsteen över relevante Schehnissen in Welt un Region. En Novum för de plattdüütsche Spraak – en grote Schangs, de ok vele Rutfödderns mit sik bringen deit.

De nedderdüütsche Medienplattform is en eerste grote Spood vun de Kampagne FUNKLOCK STOPPEN. Op uns tokamen FUNKLOCK-Onlineveranstalten in’n Novembermaand warrt de Radiomakers vun jümehr Arbeit in de Redakschoon in Kiel vertellen. Un ji as Hörers hebbt de Schangs mit jüm in’n Uttuusch to kamen. Woans gefallt jo de Sennen? Wat för Fragen hebbt ji an de Lüüd achter’t Mikro? Wat wünscht ji jo noch vun PLATTRADIO?

En Thema, dat bi PLATTRADIO bavenan steiht, dat is de Spraakutbo. Dat Plattdüütsch, wat dor bruukt warrt, ünnerscheedt sik an vele Steden wiss vun dat Platt, dat wi wennt sünd. De Redakteuren warrt vertellen, woans se de Spraak bruken doot un woans se vörgaht, wenn ne’e plattdüütsche Wöör söcht oder ole plattdüütsche Wöör wedder opleevt warrt, so as folgens, Schuul, Stietfleger, verminnern oder Verwarv.

PLATTRADIO

Onlineveranstalten. Vördrag un Diskuschoon.

Dünnersdag, 23. Novembermaand 2023, Kl. 18.30 – 20.00

Mitmaken kost nix.

Anmellen: info@niederdeutschsekretariat.de

De Veranstalten „PLATTRADIO – en Lüchttoorn för de plattdüütsche Spraak“ finnt statt ünner dat Dack vun de Kampagne „Funklock stoppen“: Organisatschonen ut all acht plattrelevanten Bunnslänner föddert en öffentlich-rechtlich Medium, dat vun morgens bet avends Informatschoon, Ünnerholen un Service op plattdüütsch büdd. Op de Been stellt warrt de Veranstalten vun’n Bunnsraat för Nedderdüütsch/Nedderdüütschsekretariat un den Sleswig-Holsteenschen Heimatbund.

Wi freut uns op Jo!

Goot 20 Intresseerten hebbt an’n 23. Oktober an de FUNKLOCK STOPPEN-Veranstalten „Spraakplanen bi de Sorben“ deelnahmen un to weten kregen, woans een de Tokumst vun en Spraak planen kann. De Referent Měto Nowak ut dat Brannenborgsche Kultusministerium in Potsdam, hett rutstellt, woso dat nich langt, en Regional- oder Minnerheitenspraak so as Plattdüütsch oder Sorbisch blots to hegen un to plegen. Dat mutt üm den Utbo vun en Spraak gahn. Un dor bruukt dat en Spraakplaan för.

Bi de Sorben löppt de Spraakplanen al siet vele Johren. Dor gifft dat Saken, de heel goot lopen doot, so as de Korpusplanen dör de Spraakkommischoon, un anner Saken. Welke vun de sünd allerbest anlopen, man anner denn ok gau wedder inslapen. Ut düsse Bispelen köönt wi lehren. In de Plicht süht Měto Nowak toeerst de Sprekergrupp – de Minschen, de de Spraak Dag för Dag bruken doot, mööt seggen, woneem dat mit jümehr Spraak hengahn schall. Wokeen bi wat för Punkten ok verantwoortlich tekent, dat mag na de Oort vun den Punkt afhangen, dat kann de Sprekergrupp sülvst, oder de Bund, de Länner, de Kommunen, oder de Weertschop ween. För en Spraak as Plattdüütsch, de vele Minschen in en groot Rebeet snacken doot, kann dat nich den een groten Plaan geven. De Spraaksubstanz is to verscheden. En Maal, dat för Sleswig-Holsteen goot to schaffen weer, kann för Brannenborg so wiet weg ween, dat dat nix hölpen wörr, in beide Länner datsülvige dörtobringen.

Měto Nowak hett de Deelnehmers Moot maakt, sik mehr mit dat Thema Spraakplanen to befaten, anner Akteuren to finnen, mit de een sik doröver uttuuschen kann. De Kampagne FUNKLOCK STOPPEN wörr dor folgens Měto Nowak goot för dögen – en Kampagne, de Parzipatschoon mööglich maakt. De Veranstalten hett wiest, wat för ünnerscheedliche Minschen tohoopkamen sünd, de sik för Spraakplanen intresseren doot. Wichtig weer dat ok, dat Thema binnen de Sprekergrupp un in de Sellschop präsenter to maken. Dat dörv keen lütte Klüngel ween, de achter verslaten Dören utklamüüstert, woans de Tokumst för Plattdüütsch utsehn kunn. Jeedeen schall de Schangs hebben mittodoon.

„Fangt lütt an. Haalt de jungen Lüüd mit in’t Boot. Kiekt jo eerstmal een Region an. Leggt realistische Malen fast, de een in korte Tiet beschicken kann. Man fangt an!“ Měto Nowak sien kloren Wöör hebbt de Deelnehmers Wind vun achtern geven. Laat uns losleggen!

Nalesen: Měto Nowak, Spraakplanen bi de Sorben (pdf)

Maandag, 23.10.2023, Kl. 18.30 – 20.00

Mit de Kampagne FUNKLOCK STOPPEN sünd wi en groten Stapp vöran kamen: To’n 1. Juli is de nedderdüütsche Medienplattform PLATTRADIO inricht worrn. Vun’n 1. September af an sennt PLATTRADIO maandags bet freedags vun Klock 7 bet Klock 8 op de Wellen vun den Apen Kanal Sleswig-Holsteen över relevante Schehnissen in Welt un Region. Kiekt mal ünner www.plattradio.com. Wi freit uns düchtig to dat Anbott – en Lüchttoorn för de plattdüütsche Spraak. Man kloor is ok: FUNKLOCK STOPPEN geiht wieder.

PLATTRADIO kann en wichtigen Bidrag leisten, wenn dat dorüm geiht, Spraakvörbiller antobeden, den Spraakutbo wiedertodrieven un de Spraak praat för de Tokumst to maken. Man liekers kann dat blots en lütten Bosteen ween un wi mööt düütlich grötter denken. Nödig is en Spraakplaan för Plattdüütsch, mit den een planen kann, wat daan warrn mutt, dat de Spraak in uns Sellschop op Duer en fasten Platz hett.

Woans plaant een de Tokumst vun en Spraak? Op uns tokamen FUNKLOCK-Onlineveranstalten in’n Oktobermaand wüllt wi mit Jo kieken, woans anner Chartaspraken dat maken doot. Dütmal blievt wi in Düütschland un wüllt uns nauer mit de Sorben befaten. To Gast is Měto Nowak ut dat Brannenborgsche Kultusministerium in Potsdam, woneem he ok as Referent vun de Lannssorbenbeopdraagte för de Sorben arbeiden deit. Měto Nowak warrt uns vertellen, woans dat mit de Spraakplanen bi de Sorben utsüht. Un wi wüllt tohoop mit Jo överleggen, wat wi uns dor för de Regionalspraak Plattdüütsch afkieken köönt.

Spraakplanen bi de Sorben

Onlineveranstalten. Vördrag un Diskuschoon.

Maandag, 23. Oktobermaand 2023, Kl. 18.30 – 20.00

Mitmaken kost nix.

Anmellen: info@niederdeutschsekretariat.de

De Veranstalten „Spraakplanen bi de Sorben“ finnt statt ünner dat Dack vun de Kampagne FUNKLOCK STOPPEN: Organisatschonen ut all acht plattrelevanten Bunnslänner föddert en öffentlich-rechtlich Medium, dat vun morgens bet avends Informatschoon, Ünnerholen un Service op plattdüütsch büdd. Op de Been stellt warrt de Veranstalten vun Bunnsraat för Nedderdüütsch/Nedderdüütschsekretariat un Sleswig-Holsteenschen Heimatbund. Wi freut uns op Jo!

Für viele Plattsprecher:innen und Sprachinteressierte im Norden erfüllt sich damit ein langersehnter Wunsch: eine professionell produzierte Radiosendung auf Plattdeutsch, in der seriös über aktuelle Themen aus Region und Welt berichtet wird. Von Montag bis Freitag ist Plattradio von 7 bis 8 Uhr auf den Wellen des Offenen Kanals Schleswig-Holstein zu hören. Zu der Sendung gehören die Nachrichten, für die der Norddeutsche Rundfunk die hochdeutschen Vorlagen liefert, Hintergrundbeiträge zu den aktuellen Themen sowie weitere journalistische Beiträge. Über plattradio.com kann die Sendung ebenfalls als Radio-Stream angehört werden. Auf der Seite finden sich außerdem ausgewählte Beiträge der Sendung. Sie werden als Audio und auch in Schriftform angeboten – insbesondere für Menschen, die die Sprache erlernen, ist dies ein hilfreiches Angebot. Die Nachrichten können auch als Podcast angehört werden (u. a. bei Deezer, Spotify und YouTube) und werden auch über die bekannten Sozialen Medien wie Instagram oder Facebook mitgeteilt.

Zu den Aufgaben der PLATTRADIO-Redaktion gehört auch der Sprachausbau. Dieser ist unerlässlich, um die Sprache zukunftsfähig zu machen: Die Zahl der aktiven Sprecher:innen sinkt und das Plattdeutsche ist immer stärker hochdeutschen Einflüssen ausgesetzt. PLATTRADIO kann hier einen wichtigen Beitrag leisten, indem es bewusste Sprachvorbilder anbietet. Es trägt darüber hinaus dazu bei, den Status der Sprache zu verbessern. Das Thema wird sich auch in der Sendung wiederfinden: Jeden Montag gibt es die Sendereihe „Wöörkist“, die sich mit der plattdeutschen Sprache und ihrer Verwendung beschäftigt. Ein Beispiel ist die plattdeutsche Vorsilbe ver-, über die Jan Graf sich Gedanken gemacht hat: Wöörkist – De Saak mit dat er- un dat ver-

Die Redaktion besteht aktuell aus Jan Graf als Leiter, Dörte Riemer als Redakteurin und Arne Lentföhr als Redakteur. Gesucht wird noch eine Redaktionsassistenz (zur Ausschreibung). Plattradio ist eine Abteilung des Schleswig-Holsteinischen Heimatbundes und wird durch das Land Schleswig-Holstein gefördert. Die Kooperationspartner sind der NDR und der Offene Kanal Schleswig-Holstein.

Die Kampagne Funklock stoppen! ist mit dem Wunsch nach einem plattdeutschen Vollprogramm angetreten. Mit Plattradio konnte nun ein erster wichtiger Meilenstein erreicht werden. Der Bunnsraat för Nedderdüütsch und der Plattdüütsche Raat Sleswig-Holsteen, die die Kampagne gemeinsam mit dem Schleswig-Holsteinischen Heimatbund betreiben, freuen sich über diesen Erfolg!

Derzeit sei nicht abzusehen, wie sich die aktuelle Haushaltssperre des Landes auf die Schaffung einer Niederdeutschen Medienplattform auswirke. „Wir freuen uns im laufenden Ausschreibungsverfahren aber weiterhin über Bewerbungen“, teilt Benjamin Abel, Geschäftsführer des Schleswig-Holsteinischen Heimatbundes, mit. Gleichzeitig müsse man jedoch mitteilen, dass aufgrund der haushaltspolitischen Lage keine Zusagen gemacht werden können, ob und wann der plattdeutsche Mediendienst seine Arbeit wird aufnehmen können, so Abel.
Am 22. März war die Förderung einer beim Heimatbund neu zu schaffenden niederdeutschen Medienplattform mit dem Landeshaushalt verabschiedet worden. Eine Redaktion, die seriös über relevantes Geschehen in Welt und Region in niederdeutscher Sprache berichtet, war lang gehegter Wunsch der niederdeutschen Sprechergruppe. Zwar würden die Vorbereitungen dazu weiterlaufen – allerdings unter deutlichem Vorbehalt, so Abel. Man sei mit dem Bildungsministerium in engem Kontakt.
Die Idee eines Mediums nach Vorbild anderer regional- und minderheitensprachlicher Medien in Europa fand Unterstützung bei Abgeordneten nahezu aller Parteien im Landtag. „Wir hoffen sehr, dass wir dieses ‚Must-Have‘ der niederdeutschen Sprachpflege nun nicht verlieren, bevor wir es überhaupt in Händen hielten“, äußert Jan Graf, Sprecher des Plattdeutschen Rates für Schleswig-Holstein.

Der Heimatbund wird über neue Entwicklungen in der Angelegenheit weiterhin informieren. Für Fragen wenden Sie sich bitte an SHHB-Referent Jan Graf, zuständig für die Bereiche Referent för Nedderdüütsch un Freesch, unter j.graf@heimatbund.de, Tel. 0431-9838415.

Eernsthaftige Berichten över Klimawannel, den Krieg in de Ukraien oder dat Noordirland-Protokoll ok op Plattdüütsch to kriegen – dat hebbt Plattdüütschen Raat för Sleswig-Holsteen, Bunnsraat för Nedderdüütsch un Sleswig-Holsteenschen Heimatbund sik al lang wünscht för de plattdüütsche Sprekergrupp. An’n Middeweken, 22.03.2023, hett de Sleswig-Holsteensche Landdag nu beslaten, dat de Lanneshuusholt för dat twete Halvjohr 2023 en Redakschoon mööglich maken warrt, de jüst düsse Arbeit leisten schall.

„Wi sünd blied un verlichtert“, seggt Kirsten Maria Voß, Sprekersch vun den Plattdüütschen Raat för Sleswig-Holsteen. „Dat geiht üm en journalistisch Angebott, wat Plattdüütsch as Spraak respekteert un hölpt, dat se fit maakt warrt ok för Rebeten as Weertschop, Wetenschop oder Politik“. En Spraak müss sik entwickeln, wenn se ok morgen noch snackt warrn schall, so Voß wieder.
Na sien Statuten will de Sleswig-Holsteensche Heimatbund Plattdüütsch wohren as levennige Spraak. Op de letzte Versammeln vun de Liddmaten ist düt Maal konkretiseert worrn. Se hebbt beslaten, dat de Heimatbund dorför en spraakpolietsch Akschoonsprogramm opsetten schall. Mit dat Konzept för de Medienplattfoorm is de eerste wichtige Busteen dorför schapen worrn.
Dat Land Sleswig-Holsteen warrt düsse Medienplattfoorm in dat twete Halvjohr 2023 mit 125 dusend Euro betahlen. Plaant is, dat se vun Maandag bet Fredag jümmers an’n Morgen een Stünn live Höörfunk mit Narichten ut Welt un Region utstrahlt un ok en Nettsiet bedrifft mit plattdüütsche Informatschonen.
De Plattdüütsche Raat för Sleswig-Holsteen harr dat Vörhebben tohopen mit den Bunnsraat för Nedderdüütsch bi’t Land Sleswig-Holsteen vörstellt. De Sleswig-Holsteensche Heimatbund steiht praat, de Middel to verwalten. „Medien, de över Politik un Tietgeschicht in Welt un Region berichten doot, sünd bi veel Minnerheiden- un Regionalspraken in Europa al begäng“, so Benjamin Abel. De niege Geschäftsföhrer bi’n Heimatbund is toversichtlich, dat dat Konzept vun de Medienplattform noch vör den Summer 2023 präsenteert warrn kann. För en Medium, wat seriös op Plattdüütsch arbeit, harr de Heimatbund sik al siet Johren insett, so Abel.

Titelbild: „Welt un Region op Nedderdüütsch – Christiane Ehlers (Nedderdüütschsekretariat) un Jan Graf (SHHB) in’t Studio vun’n Apen Kanal in Kiel“. Quelle: K. Dreyer/SHHB

De Bundesraat för Nedderdüütsch un dat Nedderdüütschsekretariat laadt junge Lüüd bet 40 to en Online-Warksteed „Platt in de Medien“ an’n 16. Augustmaand 2022, Klock 6 in.

Jan Graf, Referent för Plattdüütsch un Freesch bi’n Sleswig-Holsteenschen Heimatbund un Christiane Ehlers vun’t Nedderdüütschsekretariat stellt de Kampagne Funklock stoppen! vör. De sett sik dorför in, dat ok de plattdüütsche Sprekergrupp en öffentlich-rechtlich Medienanbott op Platt kriegen deit, dat Dag för Dag sennt warrt. Bi anner lütte Spraken in Europa is dat al lang begäng. Woso hebbt wi noch keen plattdüütschen Senner, un wat köönt wi doon, dat sik dat ännert? Un wat wünscht ji jo vun en plattdüütsch Medium? Wi freit uns op den Uttuusch un op jo Ideen un Vörslääg!
Bi de verleden Online-Warksteden hebbt sik de Deelnehmers wünscht, en Plattform to hebben, sik kennentolehren un to vernetten. Dat schall nu wiedergahn.

Junge Lüüd bet 40 Johr sünd hartlich inlaadt – tohören un uttuuschen!

• Wokeen dat maken deit: Bundesraat för Nedderdüütsch un Nedderdüütschsekretariat
• Anmellen un Nafragen: per Mail an: info@niederdeutschsekretariat.de
• Frist för’t Anmellen: Maandag, 15.08.2022
• Datum un Tiet: Dingsdag, 16.08.2022, Klock söss bet halvig acht an’n Avend
• Wo wi dat maakt: online, Zoom-Link kümmt över ‘n Mail

En Gesett för Platt?

Referent weer Měto Nowak ut dat Brannenborgsche Kultusministerium in Potsdam. Dat Bunnsland Brannenborg hett siet 1994 en Sorbengesett un is jüst dorbi un arbeidt ok an en Nedderdüütschgesett, wat – so dat dörch den Landdag kümmt – Vörbild warrn kann för anner Platt-Bunnslänner. Wo groot de Inslag is, den Rechtsnormen för de Sprekers hebbt, wiesen de velen Bispelen, de Nowak ut dat
Soorbsche bringen kunn.

De Utbu vun de Spraak

Een dorvun liggt op dat Feld vun de Sichtborkeit vun Spraak in den öffentlichen Ruum. Woneem tweesprakige Oorts- un Verkehrsschiller Plicht sünd, woneem tweesprakige Henwiesschiller an Gebüden begäng sünd, dor mutt de Spraak flott maakt warrn, dat se düsse Opgaav beschicken kann. En Kommission mutt her, de rutfinnt, wat de beste soorbsche Utdruck is för Saken, för de dat betto noch keen gifft, oder woneem en olen Utdruck, de harr passen kunnt, verswunnen is un nu wedderhaalt warrn kann.

Dat Winnen vun niege Domänen

Dat geiht sodennig nich blots dorüm, dat en Soorbsch Woort op en Schild steiht, dat geiht ok dorüm, dat Strukturen opbuut warrt, de de Spraak wiederentwickelt un so mööglich maakt, dat de Spraak ok för Rebeten as Medien, Verwalten, Hoochschool döggt. De  Spraakwetenschop snackt vun Spraakdomänen.

Dat Ansehn vun de Spraak

Dat Vörkamen in wisse Domänen kann dat Ansehn vun en Spraak, de vörher minnachtig bekeken worrn is, verbetern. Minschen lehrt en Spraak, de Ansehn hett, ehr se en Spraak lehrt, de se sülvst un de eensprakige Mehrheit keen Weert mehr bileggt. De soorbschen Oortsnaams in wisse Streken hebbt blangen de düütschen Naams offiziellen Status. Se kaamt sodennig ok in´t Navigatschoonssystem vör un stütt so dat soorbsche Gespreek vun Soorben in´t Auto, ehr se na´t Düütsche wesselt, wiel ok de Maschien Düütsch snackt. De List vun de Effekten, de en lütt Gesett, wat tweesprakige Schiller vörschrifft, hett, kann een noch lang wiederschrieven.

Strategisch dinken

Wichtig is, so Nowak, dat de Lobbyisten vun de Spraak sik kloor warrt, wat ehr Spraak bruukt, un dat se dat düütlich utspreekt. Helpen deit dat, wenn se weet, wokeen in Verwalten un Politik de Lüüd mit apen Ohren sünd för dat Thema. Goot is ok, wenn dat glückt, junge Lüüd över düt Thema in Kontakt mit Politik to bringen. Referent Měto Nowak sülvst is en Bispeel. Ut den Spraakaktivismus is för em en Baantje worrn. In´t Potsdamer Kultusministerium arbeidt he vundaag as Referent vun den Lannsbeopdraagten för de Soorben.

Keen Ünnerscheed twüschen Regionaal- un Minnerheitenspraak

Dat Inföddern vun Gesetten hett in den plattdüütschen Lobbyismus noch nich veel Ruum. As een vun de Grünnen dorför nöömt de FUNKLOCK STOPPEN-Organisatoren den Ümstand, dat vele Plattdüütschen sülvst meent, dat en Regionalspraak weniger Rechten tosteiht as en Minnerheitenspraak. Obgliek he sülvst to en Minnerheit höört, seggt Měto Nowak kloor nee to so en Bild. Poor mal hett he in sien Vördrag ünnerstütt, wat de Organisatoren vun den Onlineavend dorüm to Anfang för FUNKLOCK STOPPEN offiziell verkloort hebbt:

„Wi wüllt, dat Minnerheitenspraken un Regionalspraken gliek behannelt warrt. De Grund: All Spraken bemööt de sülvigen Swoornissen – de Sprekers warrt weniger, de Spraak an sik verfallt -, un wi wüllt all de Spraken den glieken Weert tospreken. Wi appelleert sünnerlich an de Sprekers vun dat Nedderdüütsche, dat se de egen Spraak achten doot.“ (FUNKLOCK STOPPEN, 21.06.2022)

Langen Weg

De eenunhalv Stünnen to „Spraak un Gesett“ hebbt Masse Themen ansneden, de elkeen för sik en egen Wekenenn-Warksteed utfüllen kunnen, wat een vun de Deelnehmers sä. Referent Měto Nowaks wichtigsten Tip för de plattdüütschen Aktivisten keem toletzt: En langen Aten hebben un nich den Moot verleren.

Achtergrund:

FUNKLOCK STOPPEN sett sik dorför in, dat na Vörbild vun anner lütte Spraken in Europa ok de plattdüütsche Sprekergrupp mit en öffentlich-rechtlich Medienanbott versorgt warrt, wat elkeen Dag sennen deit un mit de sülvige Qualität as in hoochdüütsche Programmen op Platt över Welt un Region berichten deit, dorto dat Wedder anseggt un Kortwiel anbütt. Dragen warrt de Kampagne vun Bundesraat för
Nedderdüütsch/Nedderdüütschsekretariat un Sleswig-Holsteenschen Heimatbund mit Ünnerstütten vun mehr as 30 Institutschonen in all acht plattrelevanten Bunnslänner.

Mehr Info: www.funklockstoppen.de
Kontakt: j.graf@heimatbund; info@niederdeutschsekretariat.de

En politischen Appell vun de Organisatoren maakt den Anfang vun düsse Online-Veranstalten: Regionalspraak un Minnerheitenspraak mööt endlich juristisch gliekstellt warrn. In Brannenborg dörvt Sorben bi’t Amt ehr Spraak bruken. Düsse un anner Rechten regelt dat Sorbengesett siet 1994. Nu is dat Bunnsland bi un will ok de Rechten vun de Plattdüütschen fastschrieven. Měto Nowak is Referent vun de Lannssorbenbeopdraagte in Potsdam un gifft Bericht to de politischen un juristischen Fragen, de düsse Prozess opsmitt. Achteran wüllt wi bekieken un besnacken, wat för rechtliche Grundlagen dat Plattdüütsche egentlich in anner Nedderdüütschlänner hett. As Bispeel kiekt wi uns Sleswig-Holsteen an. Natürlich sünd ok jümehr Woortbidrääg ut anner Plattlänner flietig willkamen.

Spraak un Gesett – Juristische Grundlagen för Soorbsch un Plattdüütsch
in Brannenborg
Onlineveranstalten. Vördrag un Diskussion.
Dingsdag, 21. Junimaand 2022, Kl. 18.30 – 20.00
Mitmaken kost nix.
Anmellen: j.graf@heimatbund.de

De Veranstalten „Spraak un Gesett“ finnt statt ünner dat Dack vun de Kampagne „Funklock stoppen“: Organisatschonen ut all acht plattrelevanten Bunnslänner föddert en öffentlich-rechtlich Medium, dat vun morgens bet avends Informatschoon, Ünnerholen un Service op plattdüütsch büdd. Op de Been stellt warrt de Veranstalten vun Bundesraat för Nedderdüütsch/Nedderdüütschsekretariat, Sleswig-Holsteenschen Heimatbund un Zentrum för Nedderdüütsch in Holsteen. Wi freut uns op Ju!

www.funklockstoppen.de